सध्या राज्यात मुसळधार पाऊस कोसळत आहे. काही ठिकाणी पावसाने दडी मारली असली तरी देखील, कोकणासह अनेक ठिकाणी मुसळधार पाऊस कोसळत आहे. दरम्यान पुण्यातून कोकणात जाणाऱ्या प्रवाशांसाठी व कोकणातून पुण्यात येणाऱ्या प्रवाशांसाठी एक महत्वाची बातमी समोर आली आहे,. भोरमार्गे महाडला जोडणारा वरंधा घाट हा २६ जून म्हणजेच आजपासून बंद करण्यात आली आहे. या मार्गावरील सर्व प्रकारची वाहतूक पूर्णपणे बंद करण्यात आली आहे.
मुसळधार पाऊस होत असल्याने कोणताही अनुचित प्रकार घडू नये यासाठी तसेच योग्य त्या उपाययोजना करण्यासाठी हा निर्णय प्रशासनाने घेतला आहे. हवामान विभागाने घाटमाथ्यासह कोकणाला यलो अलर्ट दिल्याने या मार्गावर कोणताही अनुचित प्रकार घडू नये यासाठी वरंधा घाट बंद ठेवण्यात येणार आहे. पावसाळ्यात या घाटामध्ये दरडी कोसळणे, रस्ता खचणे, माती वाहून जाणे असे प्रकार अतिवृष्टी झाल्यास होत असतात. त्या पार्श्वभूमीवर हा निर्णय घेण्यात आला आहे.
