झारखंडचे राज्यपाल सीपी राधाकृष्णन यांनी आज झारखंड मुक्ती मोर्चाचे प्रमुख हेमंत सोरेन ( Hemant Soren ) यांना सरकार स्थापनेचे निमंत्रण दिले आहे .त्यानंतर आज सायंकाळी ५ वाजता हेमंत सोरेन तिसऱ्यांदा राज्याचे १३ वे मुख्यमंत्री म्हणून शपथ घेणार आहेत. सध्या ते एकटेच मुख्यमंत्रीपदाची शपथ घेणार आहेत. मंत्रिमंडळ विस्तार आणि शपथविधी नंतर होणार आहे.अर्जुन मुंडा आणि शिबू सोरेन यांच्यानंतर हेमंत सोरेन हे तिसरे नेते आहेत, जे तिसऱ्यांदा झारखंडचे मुख्यमंत्री होणार आहेत.
हेमंत यांनी आज सकाळी राज्यपालांची भेट घेतली तेव्हा हेमंत सरकारचा शपथविधी 7 जुलै रोजी होणार असल्याचे बोलले जात होते, मात्र हेमंत सोरेन यांच्या निवासस्थानी झालेल्या बैठकीत हेमंत आज मुख्यमंत्रीपदाची शपथ घेणार असल्याचे निश्चित झाले. मंत्रिमंडळाचा विस्तार मात्र नंतर केला जाणार आहे.
मनी लाँड्रिंग प्रकरणात नुकतेच जामिनावर बाहेर आलेल्या हेमंत सोरेन यांच्यासह इंडिया नेत्यांनी राज्यपालांची भेट घेतली होती. मंत्री सत्यानंद भोक्ता, प्रदेश काँग्रेस अध्यक्ष राजेश ठाकूर, आमदार कल्पना सोरेन, विनोद सिंह यांचाही त्यात समावेश होता. राज्यपालांनी हेमंत सोरेन यांची नियुक्त मुख्यमंत्री म्हणून नियुक्ती केली आहे आणि त्यांना शपथ घेण्यासाठी आमंत्रित केले आहे. यानंतर हेमंत सोरेन यांनीही सोशल मीडियाच्या माध्यमातून राज्यपालांचे आभार मानले. तसेच विरोधकांनी रचलेल्या लोकशाहीविरोधी षडयंत्राचा अंत सुरू झाला असल्याचे सांगितले.
मुख्यमंत्रीपदाची शपथ घेतल्यानंतर हेमंत सोरेन यांच्या मंत्रिमंडळात जुने चेहरे दिसणार की नव्या आमदारांनाही स्थान मिळणार आहे. मिळालेल्या माहितीनुसार, झामुमोकडून नव्या चेहऱ्याला सामील होण्याची शक्यता दिसत नाही. याचा अर्थ हेमंत सोरेन यांच्या नव्या मंत्रिमंडळात बसंत सोरेन, मिथिलेश ठाकूर, बेबी देवी, हफिजुल हसन आणि दीपक बिरुआ हेच पुन्हा मंत्री असू शकतात.
सध्या रामेश्वर ओराव, बादल आणि बन्ना गुप्ता हे काँग्रेसचे मंत्री आहेत. आलमगीर आलम यांनी मंत्रीपदाचा राजीनामा दिला आहे. अशा स्थितीत त्यांची जागा कोण घेणार आणि काँग्रेसमधील चेहरे बदलणार की नाही, अशी चर्चा काँग्रेसमध्ये सुरू आहे.
