जम्मू-काश्मीरमधील डोडा जिल्ह्यात दहशतवाद्यांशी झालेल्या चकमकीत एका अधिकाऱ्यासह पाच जवान शहीद झाले आहेत. जम्मू विभागातील डोडापासून 300 किमी अंतरावर असलेल्या कोटी गावातील शिया धार चौंड माता वनक्षेत्रात काल संध्याकाळी ही चकमक झाली. एका लष्करी अधिकाऱ्याने दिलेल्या माहितीनुसार, या चकमकीत लष्कराच्या अधिकाऱ्यासह पाच सुरक्षा कर्मचारी जखमी झाले आहेत. जखमींना गंभीर अवस्थेत रुग्णालयात दाखल करण्यात आले. यामध्ये एका अधिकाऱ्यासह चार जवानांनी बलिदान दिले. सुरक्षा दलांनी परिसराला वेढा घातला आहे. घटनास्थळी अतिरिक्त सुरक्षा दल पाठवण्यात आले आहे.
या चकमकीत पाच जवान गंभीर जखमी झाले असून त्यांना उपचारासाठी रुग्णालयात दाखल करण्यात आल्याचे अधिकाऱ्यांनी सांगितले. मंगळवारी सकाळी उपचारादरम्यान सर्वांचा मृत्यू झाला. बलिदान दिलेल्या जवानांमध्ये एक लष्करी अधिकारी आणि तीन जवान आणि जम्मू-काश्मीर पोलिसांचा समावेश आहे. राष्ट्रीय रायफल्स आणि जम्मू-काश्मीर पोलिसांच्या विशेष ऑपरेशन ग्रुपच्या जवानांनी संध्याकाळी ७:४५ च्या सुमारास जंगल परिसरात संयुक्त घेराव आणि शोध मोहीम सुरू केली तेव्हा चकमक सुरू झाली.
गोळीबारानंतर दहशतवाद्यांनी पळून जाण्याचा प्रयत्न केला. एका अधिकाऱ्याच्या नेतृत्वाखाली शूर सैनिकांनी घनदाट जंगलातून आव्हानात्मक प्रदेशात त्यांचा पाठलाग केला, त्यानंतर रात्री 9 च्या सुमारास जंगलात आणखी एक चकमक झाली, ज्यामध्ये पाच सैनिक गंभीर जखमी झाले.लष्कराच्या व्हाईट नाइट कॉर्प्सने 10 तारखेच्या रात्री एका पोस्टमध्ये लिहिले, “विशिष्ट गुप्तचर माहितीच्या आधारे, डोडाच्या उत्तरेकडील सामान्य भागात लष्कर आणि पोलिसांकडून संयुक्त कारवाई सुरू होती.” रात्री ९ वाजताच्या सुमारास दहशतवाद्यांशी संपर्क प्रस्थापित झाला, त्यानंतर जोरदार गोळीबार झाला. या भागात अतिरिक्त फौजफाटा पाठवण्यात आला आहे.
24 तासांपूर्वी उत्तर काश्मीरमधील कुपवाडा येथे सुरक्षा दलांनी तीन दहशतवाद्यांना ठार मारले होते. ठार झालेल्या तीन दहशतवाद्यांकडून मोठ्या प्रमाणात शस्त्रसाठा जप्त करण्यात आला आहे. नियंत्रण रेषेजवळ झालेल्या चकमकीत ठार झालेले दहशतवादी मोठ्या हल्ल्याच्या तयारीत होते. पोलीस आणि लष्कराच्या जवानांनी त्यांचे नापाक हेतू उद्ध्वस्त केले.
