Dharamveer 2 : गेल्या काही दिवसांपासून चर्चेत असलेला ‘धर्मवीर 2’ या चित्रपटाची रिलीज डेट आता पुढे ढकलण्यात आली आहे. ‘धर्मवीर 2’ या चित्रपटात मराठी अभिनेता प्रसाद ओक मुख्य भूमिकेत आहे. हा चित्रपट येत्या 9 ऑगस्ट रोजी प्रदर्शित केला जाणार होता. मात्र, महाराष्ट्रात आलेल्या अतिवृष्टीमुळे निर्मात्यांनी चित्रपट पुढे ढकलण्याचा निर्णय घेतला आहे.
याविषयीची माहिती देताना चित्रपटाचे निर्माते मंगेश देसाई यांनी सांगितले, “गेल्या काही दिवसांपासून महाराष्ट्रात पूरजन्य परिस्थिती निर्माण झाली आहे. या पुरामध्ये अनेकांचा संसार पाण्यात गेला आहे. राज्यात सुरु असलेली ही युद्धजन्य परिस्थिती पाहता ‘धर्मवीर 2’ हा चित्रपट 9 ऑगस्टला प्रदर्शित करणं योग्य वाटत नाही. महाराष्ट्रातील जनतेच्या डोळ्यांत पाणी असताना, त्यांच्यासमोर इतक्या अडचणी असताना त्याच काळात चित्रपट प्रदर्शित करण्यापेक्षा परिस्थितीचा आढावा घेऊन आम्ही चित्रपटाच्या प्रदर्शनाची तारीख जाहीर करू.”
धर्मवीर चित्रपटाच्या पहिल्या भागाला चांगला प्रतिसाद मिळाल्यानंतर आता ‘धर्मवीर 2’ च्या ट्रेलरला देखील प्रेक्षकांचा चांगला प्रतिसाद मिळत आहे. अशातच प्रेक्षकांमध्ये दुसऱ्या भागाविषयी खूप उत्सुकता लागली आहे. मात्र, आता या चित्रपटासाठी प्रेक्षकांना आणखी प्रतीक्षा करावी लागणार आहे.
आनंद दिघे यांचा जीवनप्रवास मांडण्याचा प्रयत्न धर्मवीर मुक्काम पोस्ट ठाणे या सिनेमातून करण्यात आला होता. आता धर्मवीर -2 या सिनेमाद्वारे त्यांचे हिंदुत्व आणि सर्वसामान्य लोकांसाठी त्यांनी केलेला संघर्ष लोकांसमोर येणार आहे.
