बांगलादेशातील आंदोलनाने आता हिंसक वळण घेतले आहे. बांगलादेशात आरक्षणाच्या मुद्द्यावरून सुरू झालेली निदर्शने आता नियंत्रणाबाहेर गेल्याचे चित्र समोर आले आहे. देशभरात हिंसाचार मोठ्या प्रमाणात वाढला आहे. देशातील बिकट परिस्थिती पाहता शेख हसीना यांनी पंतप्रधानपदाचा राजीनामा दिला असून त्यांनी बांगलादेश सोडला आहे, आणि भारतात दाखल झाल्या आहेत. दरम्यान बांग्लादेशच्या हिंसाचाराच्या आणि घडलेल्या घडामोडींच्या पार्श्वभूमीवर मोदी सरकारने सर्वपक्षीय बैठक बोलावली आहे.
बांगलादेशातील हिंसाचाराच्या पार्श्वभूमीवर भारताची राजधानी नवी दिल्लीत हालचालींना वेग आला आला आहे. बांगलादेशच्या माजी पंतप्रधान शेख हसीना हिंडन एअरबेसच्या सेफ हाऊसमध्ये सुरक्षित आहेत. आता केंद्रातील मोदी सरकारने बांगलादेशच्या मुद्द्यावर सर्वपक्षीय बैठक बोलावली आहे. यामध्ये पुढील रोडमॅपवर चर्चा केली जाईल. या बैठकीत परराष्ट्र मंत्री एस जयशंकर बांगलादेशातील राजकीय परिस्थितीबाबत माहिती देतील. केंद्र सरकारच्या प्रमुख मंत्र्यांव्यतिरिक्त काँग्रेस अध्यक्ष मल्लिकार्जुन खर्गे, टीएमसीचे सुदीप बंदोपाध्याय, सपा प्रमुख अखिलेश यादव यांच्यासह विरोधी पक्षांचे वरिष्ठ नेते सर्वपक्षीय बैठकीत उपस्थित राहणार आहेत.
काल रात्री उशिरा पंतप्रधान निवासस्थानी पंतप्रधान मोदींच्या अध्यक्षतेखाली बांगलादेशातील परिस्थितीबाबत आढावा बैठक झाली. NSA अजित डोवाल यांनी बांगलादेशच्या माजी पंतप्रधानांशीही सुमारे दीड तास चर्चा केली. या सर्व परिस्थितीमध्ये भारताने बांगलादेश सीमेवर हाय अलर्ट जारी केला आहे. भारताच्या सर्व सुरक्षा यंत्रणांनीही पूर्ण तयारी केली आहे.
बांगलादेशात परिस्थिती नियंत्रणाबाहेर जात असल्याचे दिसत आहे. येथे हिंसक जमावात लपलेले बदमाश खूप कहर करत आहेत. आता बदमाशांनी बांगलादेशच्या शेरपूर जिल्हा कारागृहावर हल्ला केला आणि सुमारे 500 कैद्यांना तुरुंगातून पळून जाण्यास मदत केली. सोमवारी, कर्फ्यू दरम्यान, लाठ्या आणि शस्त्रे घेऊन सज्ज असलेल्या स्थानिक जमावाने मिरवणूक काढली. यादरम्यान शहरातील दमदमा-कालीगंज परिसरात असलेल्या जिल्हा कारागृहावर जमावाने हल्ला केला. बदमाशांनी जेलचे गेट तोडून पेटवून दिले.
