Jayant Patil on Ajit Pawar : आगामी विधानसभा निवडणुकीच्या पार्श्ववभूमीवर सर्व पक्षांनी कंबर कसली असून, प्रचाराला सुरुवात केली आहे, तसेच अनेक नेते महाराष्ट्र्र तसेच दिल्लीच्या दौऱ्यावर आहेत, दरम्यान , राज्याचे उपमुख्यमंत्री अजित पवार देखील अनेक दौरे करताना दिसत आहेत, यातच राष्ट्रवादी काँग्रेस पक्षाने ‘जनसन्मान यात्रे’चा शुभारंभ केला आहे. या यात्रेची सुरुवात नाशिकच्या दिंडोरीतून झाली, या यात्रेत अजित पवार गुलाबी रंगाच्या जॅकेटमध्ये पहायला मिळाले. अजित पवारांचा हा अंदाज पाहून राष्ट्रवादी शरद पवार गटाचे प्रदेशाध्यक्ष जयंत पाटील यांनी त्यांच्यावर खोचक टीका केली आहे.
नाशिकच्या दिंडोरीतून सुरु झालेल्या या यात्रेत गुलाबी रंगाची हवा आली. अजित पवारांच्या ताफ्यातील गाड्या, गुलाबी रंगाचे बॅनर तसेच आयोजनासाठी नेमण्यात आलेल्या सदस्यांनी गुलाबी रंगाचे जॅकेट परिधान केल्याचे दिसले.
यावरूनच जयंत पाटील यांनी टोला लगावत म्हंटले, “आमची यात्रा ही साधी आहे. आमचा कोणताही इव्हेंट नाही. जनतेच्या मनातील प्रश्न आम्ही मांडत आहोत. त्यासाठी कोणता विशिष्ट रंग देण्याची गरज नाही. त्यामुळं आमच्या यात्रेला जनसामान्यांचा पाठिंबा आहे,”
उपमुख्यमंत्री अजित पवारांच्या ‘जनसन्मान यात्रे’नंतर आज शरद पवार यांच्या राष्ट्रवादीची ‘शिवस्वराज्य यात्रा’ सुरू होत आहे. यात्रेचा पहिला दिवस प्रदेशाध्यक्ष जयंत पाटील, खासदार अमोल कोल्हे, आमदार रोहित पवारां यांच्या उपस्थितीत पार पडणार आहे. शिवजन्मभूमी किल्ले शिवनेरी गडाच्या पहिल्या पायरीला अभिवादन करून या यात्रेचा शुभारंभ करण्यात आला असून, यावेळी माध्यमांशी संवाद साधत असताना जयंत पाटलांनी अजित पवारांच्या जनसन्मान यात्रेवर निशाणा साधला आहे.
