मराठी रसिकांसाठी एक दुःखद बातमी समोर आली आहे. अनेक मराठी चित्रपट, मालिका आणि सिनेमांमधून काम केलेले ज्येष्ठ अभिनेते विजय कदम यांचे दुःखद निधन झाले आहे. आज पहाटे मुंबईत विजय कदम यांचे निधन झाले आहे. विजय कदम अनेक वर्षे कॅन्सरशी झुंज देत होते. त्यातून ते बरे झाले होते. मात्र पुन्हा त्यांना कॅन्सरचा त्रास सुरू झाल्याने मुंबईतील अंधेरी येथे ऍडमिट करण्यात आले होते.
अभिनेते विजय कदम १९८० ते १९९० च्या काळात लोकप्रिय होते. विजय कदम त्यांच्या अष्टपैलू अभिनय क्षमतेसाठी ओळखले जात असे. गंभीर भूमिकांप्रमाणेच त्यांनी विनोदी भूमिका देखील साकारल्या आहेत. विजय कदम यांच्या निधनानंतर संपूर्ण कलासृष्टीत हळहळ व्यक्त होत आहे. आज अंधेरी येथे स्मशानभूमी अंतिम संस्कार करण्यात येणार आहेत. अभिनेते विजय कदम यांचे वय ६७ वर्षे होते. पत्नी आणि एक मुलगा असा त्यांचा परिवार आहे.
