Ansar Force Protest : मागील महिन्यात बांगलादेशात मोठ्या प्रमाणात हिंसक निदर्शने झाल्यानंतर तिथल्या पंतप्रधान हसीना शेख यांना राजीनामा देत देश सोडवा लागला होता. नंतर बांगलादेशात मोहम्मद युनूस यांच्या नेतृत्वाखाली अंतरिम सरकार स्थापन करण्यात आले. आता परिस्थिती सामान्य होत असतानाच अचानक अंसार फोर्सने बांगलादेशात पुन्हा गोंधळ घातला आहे.
गेल्या रविवारी, नोकरीच्या सुरक्षेच्या मागणीसाठी अन्सार दलाच्या सदस्यांनी केलेल्या निदर्शनाचे रुपांतर आता हिंसाचारात झाले, ज्यात किमान ४० लोक गंभीर जखमी झाले आहेत. या निदर्शनामुळे बांगलादेश पुन्हा नव्या संकटात सापडला आहे.
बांगलादेशातील अन्सार दलाच्या निदर्शनामुळे निर्माण झालेल्या अशांततेने तेथील नवीन सरकारसमोर मोठे आव्हान उभे केले आहे. देश नाजूक परिस्थितीतून जात असताना अन्सार फोर्सच्या निषेधाचा जोरदार फटका बसला आहे. नोकऱ्यांचे राष्ट्रीयीकरण आणि चांगल्या कामाच्या परिस्थितीसाठी अन्सार दलाने सरकारला कोंडीत टाकले आहे, ज्याचे राजकीय आणि सामाजिकदृष्ट्या परिणाम होऊ लागले आहेत.
अंसार फोर्समध्ये अनेक दिवसांपासून असंतोष आहे. याचे कारण कामगारांच्या कामाची अनिश्चित परिस्थिती असल्याचे सांगितले जात आहे. अन्सार गट हा निमलष्करी दल आहे. त्यांच्या नोकऱ्या कायम कराव्यात, अशी अन्सार ग्रुपची मागणी आहे.
जनरल अन्सारच्या सदस्यांची रोजच्या पगारावर भरती केली जाते. त्यांना दररोज ५४० रुपये मिळतात जे जगण्यासाठी पुरेसे नाहीत. अशा स्थितीत अन्सार दलातील लोक नोकऱ्यांचे राष्ट्रीयीकरण करण्याची मागणी करत आहेत. या मागणीसह अन्सार आर्मी गेल्या रविवारी नॅशनल प्रेस क्लबसमोर जमली आणि बांगलादेश सचिवालयाकडे मोर्चा वळवला. हे लोक शांततेत रॅली करत असताना अचानक हिंसाचार सुरू झाला. ही परिस्थिती नियंत्रणात आणण्यासाठी पोलिस आणि लष्कर तैनात करण्यात आले.
352 जणांना अटक
या आंदोलनात प्रमुख विद्यार्थी नेत्यांना ताब्यात घेतल्याची माहिती मिळाल्यावर ढाका विद्यापीठातील विद्यार्थीही त्यांच्यात सामील झाले तेव्हा अन्सार फोर्स आणि सरकार यांच्यातील संघर्ष टोकाला पोहोचला. सरकारने कडक कारवाई करत अतापर्यंत 352 जणांना अटक केली आहे. या संपूर्ण प्रकरणानंतर आता गृह मंत्रालयाने अन्सार सदस्यांच्या मागण्यांचा आढावा घेण्यासाठी 7 सदस्यीय समिती स्थापन केली आहे.
काय आहे अन्सार फोर्स? कधी झाली स्थापना?
अन्सार फोर्सबद्दल बोलायचे झाले तर त्यांनी बांगलादेशच्या सुरक्षेत महत्त्वाचे योगदान दिले आहे. इतकं सगळं असूनही त्यांना बराच काळ अडचणींचा सामना करावा लागला. भारताच्या फाळणीनंतर 12 फेब्रुवारी 1948 रोजी अन्सार फोर्स अस्तित्वात आली, पाकिस्तान सरकारने पूर्व पाकिस्तान म्हणजेच सध्याच्या बांगलादेशमध्ये अंतर्गत सुरक्षा राखण्यासाठी अन्सार फोर्सची स्थापना केली होती. 1965 मध्ये भारत-पाकिस्तान युद्ध सुरू झाले तेव्हा त्यांना युद्धात सामील करून सीमेवर बांधलेल्या चौक्यांवर तैनात करण्यात आले.
एवढेच नाही तर 1971 मध्ये बांगलादेशच्या स्वातंत्र्य संग्रामादरम्यान पाकिस्तान सरकारने अन्सार फोर्स पूर्णपणे संपवली होती. परंतु असे असतानाही 40,000 अन्सार सदस्य स्वातंत्र्य लढ्यात सामील झाले आणि त्यातील हजारो लोकांना आपले प्राण गमवावे लागले.
