Ganpati Visarjan 2024 : आजच्या अनंत चतुर्दशीला गणरायाला निरोप देण्यासाठी पुणेकर सज्ज झाले आहेत. सकाळपासूनच बाप्पाच्या निरोपाची तयारी सुरु झाली आहे, एक दोन तीन चार, गणपतीचा जयजयकार, गणपती गेले गावाला चैन पडेना आम्हाला, गणपती बाप्पा मोरया, पुढच्या वर्षी लवकर या, असा जयजयकार करत ढोल-ताशांच्या गजरात आपल्या लाडक्या बाप्पाला निरोप दिला जाणार आहे.
पुण्यातील पाच मनाच्या गणपतीच्या मिरवणुकीची तयारी देखील जोरदार सुरु आले. बाप्पाला निरोप देण्याची वेळ जवळ आली असून सर्व गणेशभक्तांचे डोळे पाणावले आहेत.
जरवर्षी प्रमाणे यंदाही मानाच्या आणि प्रमुख मंडळांनी विसर्जनाची जय्यत तयारी केली आहे. ढोल-ताशा पथक, बॅंड, ध्वजपथक याशिवाय विविध संस्था आणि संघटनांचा सहभाग या सगळ्या गोष्टींचे नियोजन जवळपास पूर्ण झाले आहे.
पुण्याच्या वैभवशाली परंपरेचा भाग असलेल्या विसर्जन मिरवणूका यंदाही आकर्षक असणार आहे. यावेळीही विसर्जन मिरवणुकीसाठी तब्बल साडेतीनशे शंख वादक सहभागी झालेले आहेत. या साडे तीनशे शंख वादनाने विसर्जन मिरवणुकीला सुरुवात होणार आहे. काही वेळातच विसर्जन मिरवणुकांना सुरुवात होणार असून, सर्व मंडळांनी याची जोरदार तयारी केली आहे.
दरम्यान, यावर्षी नागरिकांचा उत्साह पाहता मोठ्या प्रमाणात पोलीस बंदोबस्तही तैनात करण्यात आला आहे. कालपासूनच मोठ्या प्रमाणात पोलीस रस्त्यावर बंदोबस्तासाठी तैनात करण्यात आले आहेत, तसेच मिरवणुकांच्या पार्श्ववभूमीवर पुण्यातील मुख्य रस्ते देखील बंद करण्यात आले आहेत. सकाळापासूनच मुख्य रस्त्यांवर बॅरीगेट्स लावण्यात आले आहेत. तसेच पार्किंग व्यवस्थाही करण्यात आली आहे.
विसर्जन मिरवणुकीची माहिती मिळवण्यासाठी वापरा ‘हे’ ॲप
जर तुम्हाला पुण्यातील गणेश विसर्जन मिरवणुकीची माहिती हवी असेल तर तुम्ही ती एका ॲप द्वारे मिळवू शकता. गणेश विसर्जनादिवशी ‘माय सेफ पुणे’ अॅपद्वारे बंदोबस्त आणि मंडळांची माहिती मिळवू शकता. वाहनांच्या पार्किंगसाठी जागा, पोलिस मदत केंद्रे, पादचारी मार्ग यांची माहिती या माध्यमातून उपलब्ध होणार आहे. तसेच विसर्जन मिरवणूक मार्ग, बंद रस्ते आणि मंडळांच्या मिरवणुकीबाबत सद्य:स्थितीची माहिती दिली जाणार आहे.
