Bangladesh : जागतिक बँकेने (World Bank) मंगळवारी चालू आर्थिक वर्षात बांगलादेशला (Bangladesh) US $ 2 अब्ज अतिरिक्त मदत देण्याची घोषणा केली आहे. ही रक्कम महत्त्वाच्या सुधारणा, पूरस्थिती, उत्तम हवेची गुणवत्ता, आरोग्य सेवा आणि पायाभूत सुविधांच्या विकासासाठी दिली जाईल.
जागतिक बँकेचे प्रादेशिक संचालक अब्दुलाये सेक यांनी ढाका येथे बांगलादेशच्या अंतरिम सरकारचे मुख्य सल्लागार मुहम्मद युनूस यांची भेट घेतली तेव्हा त्यांनी मदत जाहीर केली. यावेळी सेक म्हणाले की, ‘अंतरिम सरकारच्या सुधारणांच्या अजेंड्याला पाठिंबा देण्यासाठी जागतिक बँक बांगलादेशला दिलेली कर्जे वाढवण्यास वचनबद्ध आहे.’
सोशल मीडिया प्लॅटफॉर्मवर ही माहिती शेअर करताना युनूस यांनी लिहिले, “SEC नुसार, जागतिक बँक चालू आर्थिक वर्षात गंभीर सुधारणा, पूर परिस्थिती, सुधारित हवेची गुणवत्ता आणि आरोग्य सेवांना समर्थन देण्यासाठी $ 2 अब्ज अतिरिक्त सहाय्य प्रदान करेल.”
अमेरिकेनेही केली मदत
यापूर्वी अमेरिकेने बांगलादेशला 202.25 दशलक्ष डॉलर्सची मदत देण्याची घोषणाही केली होती. बांगलादेशच्या अर्थ मंत्रालयाच्या म्हणण्यानुसार, ही रक्कम युवक कल्याण, आरोग्य सेवा सुधारण्यासाठी आणि व्यवसायाच्या संधी वाढवण्यासाठी वापरली जाईल.
बांगलादेशमध्ये हाहाकार
अलीकडेच, बांगलादेशमध्ये मोठ्या प्रमाणात निदर्शने झाल्यानंतर पंतप्रधान शेख हसीना यांना देश सोडून पळून जावे लागले, ज्यामुळे राजकीय परिस्थिती आणखी बिघडली. आंदोलकांनी पंतप्रधानांचे निवासस्थान, संसद आणि इतर महत्त्वाच्या ठिकाणी तोडफोड केली. या स्थितीत हिंदू समाजावरील अत्याचारही वाढले ज्यामुळे अनेक प्रमुख हिंदू मंदिरांचे नुकसान झाले.
नवीन सरकारच्या स्थापनेनंतर नोबेल पारितोषिक विजेते मोहम्मद युनूस यांची बांगलादेशच्या कार्यवाहक पंतप्रधानपदी नियुक्ती करण्यात आली आहे. युनूस यांच्या नेतृत्वाखाली बांगलादेश सरकारला आशा आहे की, जागतिक बँकेच्या मदतीने देशात सुधारणांच्या दिशेने ठोस पावले उचलता येतील.
