जालना-बीड ( Jalna bid ) मार्गावर मठ तांडा येथे गुरुवारी सकाळी एका प्रवासी बस आणि मोसंबी वाहतूक करणाऱ्या ट्रकमध्ये भीषण अपघात झाला आहे. या अपघातात 6 जणांचा मृत्यू झाला असून, अनेक प्रवासी जखमी झाले आहेत. जखमींपैकी काहींची प्रकृती गंभीर असल्याचे सांगितले जात आहे. हा अपघात जालना वडीगोद्री मार्गावर अंबडपासून 10 किमी अंतरावर घडला आहे.
या धडकेत बस आणि ट्रकच्या पुढच्या भागांचा चक्काचूर झाला आहे. मोसंबी वाहतूक करणारा ट्रक रस्त्यावर तुटलेला होता, तर बसमधील अनेक प्रवासी धडकेच्या तीव्रतेमुळे बाहेर फेकले गेले इतकी भयंकर ही धडक होती. यानंतर घटनास्थळी स्थानिक नागरिकांनी धाव घेत जखमींना तातडीने बाहेर काढून अंबड येथील शासकीय रुग्णालयात दाखल केले. अपघात झालेल्या या बसमधून 25 ते 30 प्रवासी प्रवास करत होते,यातील 6 जणांचा मृत्यू झाला आहे आणि अनेकांना गंभीर जखमा झालेल्या आहेत.
या अपघातात मृत झालेल्या व्यक्तींची ओळख अद्याप पटविण्यात आलेली नाही, पण संबंधित कुटुंबांना माहिती देण्याचे काम सुरू आहे. तसेच, अपघातामध्ये ट्रकचालकाचाही मृत्यू झाल्याची माहिती मिळालेली आहे. स्थानिक पोलिसांनी घटनास्थळी येऊन प्राथमिक चौकशी सुरू केली आहे. या अपघातामुळे परिसरातील नागरिकांमध्ये भीतीचे वातावरण निर्माण झाले आहे.
दरम्यान, ट्राफिक नियमांचे पालन न केल्यामुळे या प्रकारचे अपघात होत असल्याचा आरोप अनेकांनी केला आहे. भविष्यात अशा दुर्दैवी घटना घडू नयेत यासाठी ट्राफिक नियमांचे पालन करण्याचे आवाहन पोलिसांकडून करण्यात येत आहे.
