मनसे अध्यक्ष राज ठाकरे (Raj Thackeray) यांनी वांद्रे येथील गॅलेक्सी अपार्टमेंटमध्ये सलमान खानची(Salman Khan) त्याच्या घरी जाऊन भेट घेतली आहे. यामुळे अनेक चर्चा होऊ लागल्या आहेत. राज ठाकरे यांनी सलमान खानची भेट का घेतली असावी असा प्रश्न सर्वांना पडला आहे. परंतु एका कार्यक्रमाचे निमंत्रण देण्यासाठी राज ठाकरे यांनी सलमान खानची भेट घेतली आहे. राज ठाकरे यांच्यावर आधारित ‘येक नंबर’ (Yek Number) हा सिनेमा लवकरच रिलीज होणार आहे. 25 सप्टेंबर रोजी या चित्रपटाचा ट्रेलर लाँच कार्यक्रम ताज हॉटेल येथे पार पडणार आहे याचेच आमंत्रण सलमान खानला देण्यासाठी राज ठाकरे यांनी त्याची भेट घेतली आहे असे म्हटले जात आहे परंतु याबाबतची कोणतीच अधिकृत माहिती अजून मिळालेली नाही.
ताज हॉटेलवर होणाऱ्या या कार्यक्रमाला अभिनेता आमिर खान, दिग्दर्शक राजकुमार हिरानी, आशुतोष गोवारीकर, निर्माता साजिद नाडियादवाला, अभिजीत जोशी आणि राज ठाकरे यांची उपस्थिती असणार आहे. ‘येक नंबर’ हा चित्रपट राज ठाकरे यांच्यावर आधारित आहे. 10 ऑक्टोबर रोजी हा चित्रपट प्रदर्शित होणार आहे. अभिनेता धैर्य घोलप याने या चित्रपटात मुख्य भूमिका साकारलेली आहे. या चित्रपटाच्या निर्मात्या वरदा साजिद नाडियाडवाला आणि तेजस्विनी पंडित या आहेत. या चित्रपटातील गाण्यांना अजय अतुल यांनी आवाज दिला आहे. तसेच संजय मेमाणे यांच्याकडे या चित्रपटाच्या छायाचित्रणाची जबाबदारी होती.
या चित्रपटाचा टीझर प्रदर्शित झाला असून प्रेक्षकांना राज ठाकरे यांचा हा बायोपिक तर नाही ना असा प्रश्न पडलेला आहे. काही प्रेक्षकांना याचा टीझर अतिशय आवडला असून त्यांच्याकडून सकारात्मक प्रतिक्रिया येत आहेत. या चित्रपटाच्या निर्मात्या तेजस्विनी पंडित यांनी आपली प्रतिक्रिया दिलेली आहे. त्या म्हणाल्या आहेत की, टिझरला मिळणारा प्रतिसाद पाहिल्यानंतर चित्रपट प्रेक्षकांना नक्कीच आवडेल , अशी खात्री वाटत आहे. ‘येक नंबर’ची कथा अतिशय कमालीची आहे आणि ही कथाच या चित्रपटाचा नायक आहे.
