पुणे जिल्ह्यातील रांजणगाव एमआयडीसीजवळील कारेगाव परिसरात राहणाऱ्या २१ बांगलादेशी नागरिकांना भारतात बेकायदेशीरपणे वास्तव्य केल्याच्या आरोपावरून दहशतवादविरोधी शाखेने अटक केली आहे. मिळालेल्या माहितीनुसार,दहशतवादविरोधी शाखेने 15 पुरुष, 4 महिला आणि 2 ट्रान्सजेंडर यांना आधार कार्ड, पॅन कार्ड आणि मतदार ओळखपत्रासह बनावट भारतीय ओळखपत्रे बाळगल्याबद्दल अटक केली आहे.
यानंतर पासपोर्ट कायद्याच्या उल्लंघनाखाली तपास सुरू करण्यात आला आहे. तपासादरम्यान अधिकाऱ्यांना आढळून आले की, ‘नऊ जणांकडे बनावट आधार आणि पॅनकार्ड होते, तर एका व्यक्तीकडे गुजरातचे बनावट मतदार ओळखपत्र होते. अटक करण्यात आलेल्या व्यक्तींनी विविध बेकायदेशीर मार्गांनी भारतात प्रवेश केल्याची माहिती आहे, काहींनी पश्चिम बंगालमार्गे सीमा ओलांडली आणि काहींनी समुद्रमार्गे प्रवेश केला आहे.
पोलिसांनी दिलेल्या माहितीनुसार, सर्व 21 जणांना 24 ऑक्टोबरपर्यंत कोठडीत ठेवण्यात आले आहे कारण त्यांची पार्श्वभूमी, त्यांनी भारतात प्रवेश करण्याचे कारण आणि ते कोणत्याही दहशतवादी संघटनेशी संबंधित आहेत की नाही याचा तपास सुरू ठेवला आहे. अधिकारी या बनावट कागदपत्रांच्या उत्पत्तीचा सक्रियपणे तपास करत आहेत आणि त्यांचे बेकायदेशीर स्थलांतर करणारे नेटवर्क शोधण्याचा प्रयत्न करत आहेत.
पोलिसांच्या कारवाईत अजमुल सरतखान उर्फ हसिफ खान (वय ५०), मोहम्मद अकबर अजीज अकबर सरदार (वय ३२) शफिकउल अलीमिया शेख (वय २०) हुसेन मुखिद शेख (वय ३०) तरिकुल अतियार शेख (वय ३८) मोहम्मद उमर फारूख बाबु उर्फ बाबु बुकतीयार शेख (वय ३२) शाहिन शहाजान शेख (वय ४४) मोहम्मद हुसेन शेख (वय ३२) रौफ अकबर दफादार (वय ३५) इब्राहिम काजोल शेख (वय ३५) फरीद अब्बास शेख (वय ४८) मोहम्मद सद्दाम अब्दुल सखावती (वय ३५) मोहम्मद अब्दुल हबीब रहेमान सरदार (वय ३२) आलीमिया तोहकील शेख (वय ६०) मोहम्मद इसराईल फकीर (वय ३५) फिरोजा मुताकीन शेख (वय २०) लिपोया हसमुख मुल्ला (वय ३२) सलमा मलौक रोशन मलीक (वय २३) हिना मुल्ला जुल्फीकार मुल्ला (वय ४०) सोनदिप उर्फ काजोल बासुदिप बिशेश (वय ३०) येअणुर शहदाता मुल्ला (वय २५, सध्या रा. कारेगाव, ता. शिरूर,, मुळ रा बांगलादेश) अशी पकडलेल्यांची नावे आहेत.
