Pune : पुण्यात (Pune) आज सकाळी एक मोठी घटना घडली आहे. सकाळच्या सुमारास पुण्यातील मोठे बस डेपो स्वारगेटमध्ये (Swargate Pune Bus Stand) आगीची घटना घडली आहे. स्वारगेट बस डेपोमध्ये एका बसला आग लागल्याची माहिती मिळत आहे. बसला आग लागताच क्षणी तेथील उपस्थित कर्मचाऱ्यांनी प्रसंगावधान राखत आग विझवण्याचा प्रयत्न केला तसेच या घटनेची माहिती मिळताच अग्निशमन दल देखील घटनास्थळी दाखल झाले आणि आगीवर नियंत्रण मिळवण्यासाठी प्रयत्न सुरु केले.
ही घटना आज सकाळी पावणे दहाच्या सुमारास घडली असल्याची माहिती मिळत आहे. स्वारगेट बस डेपो वर्कशॉप येथील आवारात पीएमपीएमएल बसने पेट घेतल्याची माहिती अग्निशमन दलाला देण्यात आली. त्यानंतर अग्निशमन मुख्यालयातील अग्निशमन वाहन घटनेच्या ठिकाणी रवाना करण्यात आले होते.
बसने पुढच्या बाजूने अधिक प्रमाणात पेट घेतला होता. अग्निशमन दलाच्या अधिकाऱ्यांनी हे पाहताच चारही बाजूने पाण्याचा मारा सुरु केला आणि पुढील काही मिनिटातच आग विझवण्यात आली. या आगीत कोणतेही मोठे नुकसान झालेली नाही. दरम्यान, ही आग कशामुळे लागली याबाबत कोणतीही माहिती समोर आलेली नाही. याचा शोध सुरु असून, सुदैवाने या घटनेत कोणतीही जीवितहानी झालेली नाही.
या घटनेवेळी पीएमपीएमएलच्या कर्मचाऱ्यांकडून प्रसंगावधान राखत अग्निशमन दलाकडून विविध ठिकाणी देण्यात येणारी व्याख्याने व प्रात्यक्षिके याचा मोठा फायदा तर झालाच पण आगीविषयक सुरक्षा व उपाययोजना याचे प्रशिक्षण घेतल्यामुळे आज अग्निरोधक उपकरण वापरुन प्राथमिक स्वरुपात आगीवर नियंत्रण मिळवता आले अशी भावना व्यक्त करत अग्निशमन दलाचे आभार मानले आहे.
