Election Commission 2024 : आरक्षणाबाबत राहुल गांधींनी (Rahul Gandhi) केलेल्या वक्तव्याविरोधात भाजपने केंद्रीय निवडणूक आयोगाकडे तक्रार केली आहे. भाजपने (BJP) सोमवारी (11 नोव्हेंबर) केलेल्या तक्रारीत राहुल गांधी यांना प्रचारापासून थांबवावे, अशी मागणी करण्यात आली आहे. राहुल गांधींविरोधात एफआयआर नोंदवण्याच्या सूचना द्याव्यात, अशी मागणीही भाजपने निवडणूक आयोगाकडे केली आहे.
निवडणूक रॅलींमध्ये राहुल गांधींनी भाजपवर एससी आणि एसटी लोकांना नोकऱ्यांमध्ये आरक्षण न दिल्याचा आरोप केला होता. आपल्या वक्तव्यात राहुल गांधी म्हणाले होते की, सर्व उद्योग आणि नोकऱ्या पाहिल्या तर तेथे एससी-एसटी समाजाचे लोक दिसत नाहीत, अल्पसंख्याक समाजातील लोक दिसत नाहीत आणि गरीब वर्गातील लोकांनाही जागा मिळत नाहीत.
भाजपने आपल्या तक्रारीत राहुल गांधींच्या विधानाचाही उल्लेख केला आहे ज्यात त्यांनी म्हटले आहे की, ‘तुम्हाला नोकरी मिळवायची असेल तर तुम्ही आरएसएसचे सदस्यत्व घ्या तुम्हाला कुठेही नोकरी मिळेल. तिथे तुमची पात्रता काय आहे किंवा तुम्हाला काय माहित आहे किंवा माहित नाही हे देखील पाहिले जाणार नाही.
याशिवाय निवडणूक आयोगाला दिलेल्या तक्रारीत महाराष्ट्रातील सर्व उद्योग गुजरातमध्ये हलवण्याच्या राहुल गांधींच्या वक्तव्यावरही भाजपने प्रश्न उपस्थित केला असून कारवाईची मागणी केली आहे. ‘ज्या कारखान्यात तरुणांना रोजगार मिळायला हवा होता, ते कारखाने तुमच्याकडून हिसकावले गेले आहेत, तुमच्या जमिनी तुमच्याकडून हिसकावण्यात येत आहेत,’ असे राहुल गांधी यांनी आपल्या वक्तव्यात म्हटले होते.
राहुल गांधींनी आपल्या वक्तव्यात ईडी, सीबीआय आणि निवडणूक आयोग सरकारच्या इशाऱ्यावर काम करत असल्याचा आरोपही केला होता. राहुल गांधींच्या वक्तव्याचा संदर्भ देत तक्रारीत म्हटले आहे की, ‘राहुल गांधी यांनी त्यांच्या वक्तव्यात भाजपच्या वतीने निवडणूक आयोगावर दबाव आणल्याचा आणि ईडी आणि सीबीआयसारख्या संस्थांचा वापर करून सरकार पाडल्याचा आरोपही केला होता.
दरम्यान, राज्यात 288 जागांसाठी एकाच टप्प्यात 20 तारखेला मतदान होणार आहे. तर 23 रखेला मतमोजणी होणार आहे. राज्यात यावेळी महाविकास आघाडी आणि महायुती यांचा थेट सामना आहे. अशास्थितीत राज्यात कोणाचे सरकार येणार याकडे सर्वांचे लक्ष लागले आहे.
