पंतप्रधान नरेंद्र मोदी (PM Narendra Modi ) 16 ते 21 नोव्हेंबर या कालावधीत नायजेरिया, ब्राझील आणि गयाना या देशांच्या राष्ट्रीय दौऱ्यावर जात आहेत. नायजेरियाचे फेडरल रिपब्लिक अध्यक्ष बोला अहमद टिनुबू (bola ahmed tinubu) यांच्या निमंत्रणावरून पंतप्रधान 16-17 नोव्हेंबर या कालावधीत नायजेरियाला भेट देणार आहेत. 17 वर्षांत भारताच्या पंतप्रधानांची नायजेरियाची ही पहिली भेट असेल.तसेच पंतप्रधान नरेंद्र मोदी १९ ते २१ नोव्हेंबर दरम्यान गयाना दौऱ्यावर जाणार आहेत. १९६८ नंतर कोणत्याही भारतीय पंतप्रधानांचा हा पहिलाच दौरा असणार आहे. परराष्ट्र मंत्रालयाने प्रसिद्धी पत्रकाद्वारे ही माहिती दिली आहे.
नायजेरिया भेटीदरम्यान, पंतप्रधान भारत आणि नायजेरिया यांच्यातील धोरणात्मक भागीदारीचा आढावा घेण्यासाठी आणि द्विपक्षीय संबंध वाढवण्यासाठी पुढील पर्यायांवर चर्चा करतील. नायजेरियातील भारतीय समुदायाच्या मेळाव्यालाही पंतप्रधान संबोधित करतील. भारत आणि नायजेरिया हे २००७ पासून आर्थिक, ऊर्जा आणि संरक्षण क्षेत्रातील वाढत्या सहकार्यासह सामरिक भागीदार आहेत. 200 हून अधिक भारतीय कंपन्यांनी नायजेरियातील महत्त्वाच्या क्षेत्रात USD 27 अब्जहून अधिक गुंतवणूक केली आहे.
फेडरेटिव्ह रिपब्लिक ऑफ ब्राझीलचे अध्यक्ष लुईस इनासियो लुला दा सिल्वा (Luiz Inácio Lula da Silva) यांनी आयोजित केलेल्या G20 शिखर परिषदेला उपस्थित राहण्यासाठी पंतप्रधान 18-19 नोव्हेंबर, 2024 दरम्यान रिओ डी जानेरोला जातील. भारत हा ब्राझील आणि दक्षिण आफ्रिकेसह G20 त्रिकूटाचा भाग आहे . शिखर परिषदेदरम्यान, पंतप्रधान जागतिक महत्त्वाच्या विविध मुद्द्यांवर भारताची भूमिका मांडतील आणि G20 नवी दिल्ली लीडर्स डिक्लेरेशन आणि गेल्या दोन वर्षांत भारताने आयोजित केलेल्या ग्लोबल साऊथ समिटमधील परिणामांवर आधारित ते भूमिका मांडणार आहेत. तसेच G20 शिखर परिषदेच्या निमित्ताने पंतप्रधान अनेक नेत्यांना भेटणार आहेत.
को-ऑपरेटिव्ह रिपब्लिक ऑफ गयानाचे अध्यक्ष डॉ. मोहम्मद इरफान अली यांच्या निमंत्रणावरून, पंतप्रधान 19-21 नोव्हेंबर 2024 या कालावधीत गयानाला भेट देतील. गयानाची ही भारतीय पंतप्रधानांची पहिली भेट असल्याने त्याला विशेष महत्व प्राप्त झाले आहे. मोठी गोष्ट म्हणजे गयानामधील सुमारे ४० टक्के लोकसंख्या भारतीय आहे. यापूर्वी 2023 मध्ये, राष्ट्रपती अली मध्य प्रदेशातील इंदूर येथे 17 व्या प्रवासी भारतीय दिवसात प्रमुख पाहुणे म्हणून भारत दौऱ्यावर आले होते, तेव्हा त्यांना प्रवासी भारतीय सन्मान देखील प्रदान करण्यात आला होता. या भेटीदरम्यान, पंतप्रधान मोदी राष्ट्रपती अली यांच्याशी चर्चा करतील, गयानाच्या इतर वरिष्ठ नेत्यांना भेटतील, गयानाच्या संसदेला संबोधित करतील आणि भारतीय डायस्पोराच्या मेळाव्याला संबोधित करतील.
जॉर्जटाउन, गयाना येथे पंतप्रधान दुसऱ्या CARICOM-इंडिया शिखर परिषदेतही सहभागी होतील आणि CARICOM सदस्य देशांच्या नेत्यांसोबत भारताची दीर्घकालीन मैत्री आणखी वाढवण्यासाठी बैठकांमध्ये सहभागी होतील.
