हेमंत सोरेन आज चौथ्यांदा झारखंडच्या मुख्यमंत्रिपदाची शपथ घेणार आहेत. शपथविधी सोहळा भव्यदिव्य करण्यासाठी सर्व तयारी पूर्ण झाली आहे. रांचीच्या मोरहाबादी मैदानावर २८ नोव्हेंबर रोजी दुपारी ४ वाजता या शपथविधी सोहळ्याचे आयोजन करण्यात आले आहे.प्राप्त माहितीनुसार हेमंत सोरेन यांच्यासह काँग्रेस आणि राजदचे मंत्री शपथ घेतील असे सांगितले जात आहे.
या कार्यक्रमात अनेक इंडिया आघाडीचे राष्ट्रीय नेते सहभागी होणार आहेत. यामध्ये काँग्रेस अध्यक्ष मल्लिकार्जुन खर्गे, लोकसभेतील विरोधी पक्षनेते राहुल गांधी, तेजस्वी यादव, राष्ट्रवादी काँग्रेस पक्षाचे अध्यक्ष शरद पवार, मेघालयचे मुख्यमंत्री कोनराड कोंगकल संगमा, मुख्यमंत्री ममता बॅनर्जी, दिल्लीचे माजी मुख्यमंत्री अरविंद केजरीवाल, पंजाबचे मुख्यमंत्री भगवंत मान, आदींचा समावेश आहे. हिमाचलचे मुख्यमंत्री सुखविंदर सिंग सुखू, महाराष्ट्राचे माजी मुख्यमंत्री उद्धव ठाकरे, यूपीचे माजी मुख्यमंत्री अखिलेश यादव, दिल्लीचे माजी उपमुख्यमंत्री मनीष सिसोदिया, कर्नाटकचे माजी उपमुख्यमंत्री डीके शिवकुमार, तामिळनाडूचे माजी उपमुख्यमंत्री उदय स्टॅलिन, जम्मू-काश्मीरच्या माजी मुख्यमंत्री मेहबुबा मुफ्ती, एमएएसचे सरचिटणीस दीपंकर भट्टाचार्य, नवीन पटनायक, कपिल सिब्बल यांच्यासह अनेक नावांचा समावेश आहे.त्यामुळे हा सोहळा इंडिया आघाडीच्या शक्तिप्रदर्शनाचा मंच बनू शकतो.
शपथविधी सोहळ्यासंदर्भात ठिकठिकाणी होर्डिंग्ज लावण्यात येत आहेत. झामुमो आणि काँग्रेसच्या नेत्यांमध्ये प्रचंड उत्साह आहे. शपथविधी सोहळा भव्यदिव्य करण्यासाठी आणि येणाऱ्या व्हीआयपी पाहुण्यांसाठी विशेष तयारी करण्यात आली आहे. सर्व व्हीआयपी पाहुण्यांसाठी विशेष ताफा तयार करण्यात आला असून त्याद्वारे व्हीआयपी पाहुण्यांना सुरक्षितपणे कार्यक्रमस्थळी आणले जाईल. व्हीआयपींना प्रोटोकॉलनुसार सर्व सुविधा वेळेवर मिळाव्यात यासाठी पूर्ण तयारी करण्यात आली आहे. राज्याच्या पाहुण्यांचे स्वागत, त्यांचा मुक्काम, त्यांचा निरोप घेईपर्यंतचा कार्यक्रम स्थळापर्यंतचा प्रवास याची सर्वत्र तयारी करण्यात आली आहे.
झारखंडचे माजी मुख्यमंत्री आणि झारखंड मुक्ती मोर्चाचे संस्थापक शिबू सोरेन यांचे चिरंजीव हेमंत आता चौथ्यांदा मुख्यमंत्रीपदावर बसणार आहेत. गेल्या वर्षी जमीन घोटाळ्यात सक्तवसुली संचालनालयाकडून (ईडी) त्यांना अटक झाली होती. मात्र तुरूंगातून बाहेर आल्यानंतर आपल्यावर झालेल्या कारवाईचे त्यांनी सहानुभूतीच्या लाटेत रूपांतर केले. नुकत्याच झालेल्या विधानसभा निवडणूकीमध्ये स्वत:ला ‘धरतीपुत्र’ म्हणून स्थापित करीत त्यांनी ‘झारखंड झुकेगा नही,’ चा नारा देत पत्नीच्या साथीने जोरदार प्रचार केला. आदिवासी समाजाचा प्रभाव असलेल्या २८ जागांवर लक्ष केंद्रीत करण्याच्या त्यांच्या रणनीतीला तसेच बरोबरच महाराष्ट्रातील ‘लाडकी बहीण’योजनेच्या धर्तीवरील ‘मैया सन्मान योजनेला प्रतिसाद म्हणून सोरेन यांच्या पक्षाला बहुमत मिळाल्याचे दिसून आले.आता अवघ्या वर्षभराच्या काळात ते तुरुंगातून पुन्हा सत्तास्थानावर आरूढ होत आहेत.
