काल गोंदियामध्ये एसटी अपघातात ११ जण ठार तर २३ जण जखमी झाल्याची माहिती आहे. त्या पार्श्वभूमीवर काळजीवाहू मुख्यमंत्री एकनाथ शिंदे यांनी अधिकची माहिती घेत मृतांच्या नातेवाईकांना तातडीने १० लाख रुपयांची मदत देण्याचे आदेश परिवहन प्रशासनाला दिले आहेत.तसेच स्थानिक प्रशासनाला जखमी लोकांवर तातडीने आणि योग्य उपचार करावेत, अशा सूचनाही दिल्या आहेत.
दरम्यान अपघातानंतर भाजप नेते देवेंद्र फडणवीस यांनीही शोकभावना व्यक्त केल्या आहेत. त्यांनी ट्विटमध्ये आहे की, शिवशाही बसचा अपघात होऊन काही प्रवाशांचा मृत्यू झाल्याची घटना अतिशय दुर्दैवी आहे. मृतांना मी भावपूर्ण श्रद्धांजली अर्पण करतो. त्यांच्या कुटुंबीयांच्या दु:खात आम्ही सहभागी आहोत.
या घटनेत जे लोक जखमी झाले, त्यांना खाजगी रुग्णालयात उपचार द्यावे लागले तरी ते तातडीने द्या, असे निर्देश देण्यात आले आहेत. आवश्यकता भासल्यास त्यांना नागपूरला हलविण्याची व्यवस्था करा, असेही मी गोंदियाच्या जिल्हाधिकार्‍यांना सांगितले आहे. प्रशासनातील वरिष्ठ अधिकारी घटनास्थळी पोहोचले असून, ते मदतकार्यासाठी समन्वय करीत आहेत. या घटनेतील जखमींना लवकर आराम पडावा, अशी मी ईश्वरचरणी प्रार्थना करतो.असे फडणवीस आपल्या पोस्टमध्ये म्हणाले आहेत.
गोंदियात मध्ये शिवशाही बसला भीषण अपघात झाला. या अपघातात ११ जणांचा मृत्यू झाला. तर, सुमारे २३ जण गंभीर जखमी झाले आहेत . जखमींपैकी काहींची प्रकृती गंभीर असून मृतांचा आकडा वाढण्याची शक्यता आहे. गोंदिया – कोहमारा राज्य महामार्गावरील खजरी गावाजवळ शुक्रवारी दुपारी साडे बारा वाजताच्या सुमारास हा अपघात घडला. ही बस भंडारा येथून साकोली लाखनी मार्गे गोंदियाकडे जात होती. वळण घेत असताना अचानक समोरून एक दुचाकी आल्याने चालकाचे बसवरील नियंत्रण सुटल्याचे सांगण्यात आले.
