बांगलादेशातील हिंदूंवरील अत्याचार त्वरित थांबवण्यात यावेत आणि इस्कॉनचे साधू चिन्मय कृष्ण दास यांची तात्काळ सुटका करावी, असे आवाहन राष्ट्रीय स्वयंसेवक संघाने बांगलादेश सरकारला केले आहे. सरकार्यवाह दत्तात्रेय होसबळे यांनी आज यासंदर्भात एक पत्रक जारी केले असून बांगलादेशात हिंदूंवर होत असलेल्या अत्याचाराप्रकरणी निषेध व्यक्त केला आहे.
राष्ट्रीय स्वयंसेवक संघाचे सरकार्यवाह दत्तात्रेय होसबळे यांनी निवेदनात म्हटले आहे की, बांगलादेशातील हिंदू आणि इतर सर्व अल्पसंख्याकांवर इस्लामिक कट्टरपंथीयांकडून होणारे हल्ले, हत्या, लूटमार, जाळपोळ आणि महिलांवर होणारे अमानुष अत्याचार हे अत्यंत चिंताजनक असून राष्ट्रीय स्वयंसेवक संघ त्याचा निषेध करतो. हे थांबवण्याऐवजी सध्याचे बांगलादेश सरकार आणि इतर यंत्रणा केवळ मूक प्रेक्षक बनले आहेत असे दिसून येत आहे. बांगलादेशातील हिंदूंनी त्यांच्या स्वसंरक्षणासाठी लोकशाही मार्गाने उठवलेला आवाज दाबून टाकण्यासाठी त्यांच्यावरच अन्याय आणि अत्याचार होताना दिसत आहेत.तसेच हिंदूंचे अशा शांततापूर्ण आंदोलनात नेतृत्व करणाऱ्या इस्कॉन साधू चिन्मय कृष्ण दास यांना बांगलादेश सरकारने तुरुंगात पाठवणे हे अन्यायकारक असल्याचे ते म्हणाले आहेत.
होसबळे म्हणाले आहेत की, राष्ट्रीय स्वयंसेवक संघ भारत सरकारला बांगलादेशातील हिंदू आणि इतर सर्व अल्पसंख्याकांवर होणारे अत्याचार थांबवण्यासाठी प्रयत्न सुरू ठेवण्याचे आवाहन करतो आणि त्याच्या समर्थनार्थ जागतिक जनमत तयार करण्यासाठी आवश्यक ती पावले लवकरात लवकर उचलावीत.असेही सुचवत आहे.
सरकार्यवाह दत्तात्रेय होसबळे यांनी भारत सरकारला या पत्रकाद्वारे आवाहन करत म्हंटले आहे की, “या महत्त्वपूर्ण वेळी भारत आणि जागतिक समुदाय व इतर संघटनांनी बांगलादेशातील पीडितांच्या पाठीशी उभे राहून आपला पाठिंबा व्यक्त केला पाहिजे . यासाठी आपापल्या सरकारांकडून शक्य ते सर्व प्रयत्न करावेत. हे प्रयत्न जागतिक शांतता आणि बंधुभावासाठी आज आवश्यक बनले आहेत”.
