Farmers Protest : नोएडा, ग्रेटर नोएडा आणि यमुना प्राधिकरण क्षेत्रातील सुमारे एक लाखहून अधिक शेतकरी आज दिल्लीकडे निघाले आहेत. अशास्थितीत आता दिल्लीतील सुरक्षा यंत्रणा सतर्क झाली असून, शेतकऱ्यांना अडवण्यासाठी प्रयत्न सुरु केले आहेत. शेतकऱ्यांना सीमेवर अडवण्यासाठी बॅरिकेड्स लावण्यात आले आहेत. मात्र, बॅरिकेड्स तोडून शेतकरी दिल्लीत घुसण्याचा प्रयत्न करत आहेत.
भारतीय किसान परिषद (BKP) सह अनेक शेतकरी संघटना नवीन कृषी कायद्यांतर्गत न्याय नुकसान भरपाई आणि लाभांच्या मागणीसाठी आंदोलन करत आहेत. बीकेपीचा मोर्चा नोएडा येथून 2 डिसेंबरला सुरू झाला असून, 6 डिसेंबरला दिल्लीच्या दिशेने वळतील. पंजाब-हरियाणा सीमेवर उपस्थित शेतकरीही या निदर्शनात सहभागी होणार आहेत. शेतकऱ्यांच्या प्रमुख मागण्यांमध्ये एमएसपी हमी, कर्जमाफी, पेन्शन, मागील निदर्शनांदरम्यान नोंदवलेले पोलिस खटले मागे घेणे आणि 2021 च्या लखीमपूर खेरी हिंसाचारातील पीडितांना न्याय देणे यांचा समावेश आहे.
भारतीय किसान परिषदेचे (बीकेपी) नेते सुखबीर खलिफा म्हणाले की, ‘आम्ही दिल्लीकडे रवाना करण्याची तयारी करत आहोत, २ डिसेंबर रोजी आम्ही नोएडा येथील महामाया उड्डाणपुलाखालून आमची पदयात्रा सुरू करणार आहोत. दुपारपर्यंत आम्ही तिथे पोहोचू आणि नवीन कायद्यानुसार आमची नुकसानभरपाई आणि लाभांची मागणी करू.’
कोणत्या शेतकरी संघटना या मोर्च्यात सहभागी आहेत?
किसान मजदूर मोर्चा (KMM) आणि संयुक्त किसान मोर्चा (SKM-गैर-राजकीय) यासह विविध शेतकरी संघटनाही या आंदोलनात सहभागी होणार आहेत. जे 6 डिसेंबरला दिल्लीच्या दिशेने वळणार आहेत.
शेतकऱ्यांच्या मागण्या काय?
➤ कायदेशीररित्या हमी दिलेली किमान आधारभूत किंमत (MSP)
➤शेती कर्जमाफी
➤शेतकरी आणि शेतमजुरांना पेन्शन
➤मागील आंदोलनादरम्यान नोंदवलेले पोलिस गुन्हे मागे घेणे
➤ 2021 च्या लखीमपूर खेरी हिंसाचारातील पीडितांना न्याय
➤ भूसंपादन कायदा, 2013 ची पुनर्स्थापना
➤ 2020-21 च्या आंदोलनात मृत्युमुखी पडलेल्या शेतकऱ्यांच्या कुटुंबीयांना भरपाई
