विश्व हिंदू परिषद आणि बजरंग दल- मुंबई यांच्या वतीने काल बांगलादेशातील अल्पसंख्याक हिंदूंवर होणाऱ्या अत्याचाराविरोधात तसेच इस्कॉनचे बांगलादेशमधले प्रमुख चिन्मय कृष्ण दास ब्रह्मचारी यांना सूडभावनेतून केलेल्या अटकेच्या विरोधात उग्र निदर्शने करण्यात आली. कफ परेड येथील बांगलादेश दूतावासासमोर करण्यात आलेल्या या निदर्शनात हिंदू समाज प्रचंड संख्येने सहभागी झाला होता.
यावेळी बांगलादेश सरकार व तेथील जिहादी मानसिकतेचा निषेध करण्यात आला. यावेळी बांगलादेश दूतावासाला हिंदू समाजाच्या वतीने देण्यात आलेल्या निवेदनात असे म्हटले आहे की,” चिन्मय कृष्ण दास ब्रह्मचारी यांच्या अटकेमुळे बांगलादेशातील भाषण स्वातंत्र्य, सहवासाचे स्वातंत्र्य, धार्मिक प्रथा स्वातंत्र्य आणि अल्पसंख्याक समुदायांच्या संरक्षणाबाबत गंभीर चिंता निर्माण झाली आहे. निरपराध हिंदू कुटुंबांवर आणि विशेषत: हिंदू महिला आणि मुलांवर होणारे हल्ले कोणत्याही सुसंस्कृत समाजात स्वीकार्य नाहीत. गुन्हेगार मोकळेपणाने फिरत आहेत आणि सरकारच्या निष्क्रियतेमुळे त्यांना प्रोत्साहन मिळत आहे. बांगला देशातील नागरिकांचे जीवन, स्वातंत्र्य आणि नागरी हक्कांचे संरक्षण करणे ही त्या सरकारची प्रमुख जबाबदारी आहे. अल्पसंख्यांकांसह सर्व नागरिकांना सुरक्षितता आणि सुरक्षिततेची हमी देणे आणि त्यांना त्यांच्या आवडीच्या धर्माचे पालन करण्यासाठी आणि त्यांच्या प्रार्थनास्थळांचे संरक्षण करण्यासाठी अनुकूल वातावरण प्रदान करणे सरकार म्हणून त्यांचे कर्तव्य आहे.
चिन्मय कृष्ण दास ब्रह्मचारी यांच्या अलीकडील कार्यक्रमात हिंदू समुदायाला भेडसावणाऱ्या गंभीर समस्यांवर प्रकाश टाकला होता. चिथावणीचे आरोप आणि त्यांच्यावर लावलेले खोटे राजद्रोहाचे आरोप अत्यंत त्रासदायक आहेत, यातून झालेली अटक ही सूडबुद्धीने झाली असल्याचे दिसून येते. धार्मिक ध्वज, शांततापूर्ण निषेध किंवा शांततापूर्ण सार्वजनिक मेळावे यांना दंड आकारला जाऊ नये. भगवा ध्वज हिंदूंसाठी अत्यंत पवित्र आहे आणि तो फडकावणे हे कोणत्याही कल्पनेने देशद्रोह होत नाही.चिन्मय दास यांना विनाकारण झालेली अटक ही लोकशाही तत्त्वांनाच हरताळ फासणारी आहे, शिवाय धार्मिक नेते आणि अल्पसंख्यांकांच्या धार्मिक हक्कांचे हनन देखील आहे. या कठीण प्रसंगी विश्वातील हिंदू समाज एकजुटीने बांगला देशातील हिंदूंसोबतआहे आणि बांगलादेशातील अंतरिम सरकारने याची दखल घेत तातडीने पावले उचलावी, असेही या निवेदनात म्हटले आहे.
यावेळी विश्व हिंदू परिषदेचे क्षेत्र मंत्री गोविंद शेंडे, विहिंपचे प्रांत अध्यक्ष डॉ. अजय संखे, प्रांत मंत्री मोहन सालेकर, प्रांत सह मंत्री श्रीराज नायर, बजरंग दल संयोजक रणजीत जाधव व नवनिर्वाचित आमदार मंगल प्रभात लोढा उपस्थित होते.
