साप्ताहिक मार्मिक’चे माजी कार्यकारी संपादक पंढरीनाथ सावंत यांचं वृद्धापकाळानं निधन झाले आहे. ते 91 वर्षाचे होते. बाळासाहेब ठाकरे यांनी आपल्या व्यंगचित्रांमधून मुंबईतील मराठी माणसाच्या भावनांना आणि मराठी माणसांवरील अन्यायाला वाचा फोडली. ही व्यंगचित्र प्रसिद्ध मार्मिकमधून प्रसिद्ध केली जात होती.

पंढरीनाथ सावंत हे लालबाग येथील दिग्विजय मिल परिसरातील पत्रा चाळ येथे वास्तव्याला होते. येथेच त्यांच्या राहत्या घरी वृद्धापकाळानं निधन झाल्याची माहिती मिळत आहे. परखड, थेट आणि रोखठोक मते मांडणारा पत्रकार अशी पंढरीनाथ सावंत यांचे अनेक वर्ष महाराष्ट्राला ओळख आहे.

पंढरीनाथ सावंत यांच्या पत्रकारितेची दखल अनेकांनी घेतली. त्यांना विविध पुरस्कारांनी देखील गौरविण्यात आले आहे. मंत्रालयाच्या माहिती व जनसंपर्क विभागाच्या वतीने देण्यात येणाऱ्या लोकमान्य टिळक जीवनगौरव पुरस्कार, मंत्रालय व विधिमंडळ वार्ताहर कक्षाच्या वतीने देण्यात येणाऱ्या कृ. पा. सामक जीवनगौरव पुरस्काराने गौरविण्यात आलं आहे.

पंढरीनाथ सावंत यांनी प्रबोधनकार ठाकरे आणि शिवसेनाप्रमुख बाळासाहेब ठाकरे यांच्यासोबत काम केलं होतं. त्यांनी जीवनातील अनुभवावर ‘मी पंढरी गिरणगावचा’ हे आत्मचरित्र लिहिलं आहे. त्यामध्ये लालबाग आणि परळ येथे राहणाऱ्या कापड गिरणी कामगारांच्या जीवनाविषयी प्रकाश टाकला. सुरुवातीच्या काळात त्यांनी बेस्टमध्ये कंडक्टर म्हणून काम केले. त्यानंतर पत्रकार म्हणून काम केले. ‘मार्मिक’ मध्ये त्यांनी कार्यकारी संपादक काम केले. त्यांनी अनेक पत्रकार घडविले. अलीकडच्या काळात त्यांनी मुंबईबाबत पुस्तक लिहिण्यास सुरुवात केली होती.

बाळासाहेब ठाकरे यांनी पंढरीनाथ सावंत यांच्या आत्मचरित्राबाबत पत्र लिहिले होते. या पत्रात त्यांनी ‘मी पंढरी गिरणगावचा’ या आत्मचरित्राविषयी कौतुक केले होते.