पाकिस्तान विरुद्धच्या सामन्यात विराट कोहलीने चमकदार कामगिरी करत एक मोठा रेकॉर्ड आपल्या नावावर केला आहे. कोहलीने या सामन्यात 51वे शतक केले आहे. या सामन्यात कोहलीने  111 चेंडूत 7 चौकारांसह नाबाद 100 धावा केल्या आहेत.

या सामन्यात शतक लगावताच कोहलीने जागतिक विक्रम केला आहे. एकदिवसीय क्रिकेटच्या इतिहासात विश्वचषक, आशिया चषक आणि चॅम्पियन्स ट्रॉफीमध्ये पाकिस्तानविरुद्ध शतक झळकावणारा कोहली हा पहिला फलंदाज ठरला आहे.

कोहलीने 2023 च्या आशिया चषक स्पर्धेत पाकिस्तानविरुद्ध नाबाद 122 धावा केल्या होत्या. त्याच वेळी, 2015 च्या एकदिवसीय विश्वचषकात पाकिस्तानविरुद्धच्या सामन्यात किंग कोहलीने 107 धावा केल्या होत्या. आता चॅम्पियन्स ट्रॉफीमध्ये कोहलीने 100 धावा केल्या आहेत.

चॅम्पियन्स ट्रॉफीच्या इतिहासातील कोहलीचे हे पहिलेच शतक आहे. तर पाकिस्तानविरुद्धचे हे चौथे शतक आहे. कोहलीने सुमारे 15 महिन्यांनंतर एकदिवसीय क्रिकेटमध्ये शतक झळकावले आहे.

पाकिस्तानविरुद्ध सर्वाधिक एकदिवसीय शतके :-

ब्रायन लारा / 5
सचिन तेंडुलकर / 4
डेसमंड हेन्स / 4
डेविड वॉर्नर/ 4
विराट कोहली / 4

याशिवाय चॅम्पियन्स ट्रॉफीमध्ये शतक, क्रिकेट विश्वचषकात शतक आणि टी-20 विश्वचषकात त्याच संघाविरुद्ध अर्धशतक झळकावणारा कोहली हा जगातील दुसरा फलंदाज ठरला आहे.

रोहित शर्माने आपल्या कारकिर्दीत दोनदा अशी कामगिरी केली आहे. कोहलीने पाकिस्तानविरुद्ध हा पराक्रम केला आहे तर रोहितने बांगलादेशविरुद्ध हा पराक्रम केला आहे.

आंतरराष्ट्रीय क्रिकेटमधील कोहलीचे हे 82 वे शतक आहे. कोहलीने त्याच्या एकदिवसीय कारकिर्दीत 14000 धावा देखील पूर्ण केल्या आहेत. एकदिवसीय क्रिकेटमध्ये कोहली सर्वात जलद 14 हजार धावा करणारा फलंदाज ठरला आहे.  यासह कोहलीने सचिन तेंडुलकरलाही मागे टाकले आहे.