बीडचे सरपंच संतोष देशमुख हत्या प्रकरणात कॅबिनेट मंत्री धनंजय मुंडे यांचे जवळचे सहकारी वाल्मिक कराड याला आरोपी करण्यात आल्यानंतर धनंजय मुंडे यांनी आज आपल्या पदाचा राजीनामा दिला आहे. या प्रकरणात गेल्या काही दिवसांपासून धंनजय मुंडे यांचा राजीनामा विरोधक मागत होते. आज अखेर त्यांनी आपल्या पदाचा राजीनामा दिला आहे.
यावरच आता राज्याचे मुख्यमंत्री देवेंद्र फडणवीस यांनी महत्वाची प्रतिक्रिया दिली आहे. धनंजय मुंडे यांच्या राजीनाम्याबाबत बोलताना मुख्यमंत्री देवेंद्र फडणवीस म्हणाले की, “धनंजय मुंडे यांनी राजीनामा सादर केला आहे. मी त्यांचा राजीनामा स्वीकारला असून, राज्यपालांकडे पुढील कारवाईसाठी पाठवला आहे.”
सरपंच संतोष देशमुख यांचं हत्या प्रकरण जसं-जसं उलगडू लागलं तसं-तसं यामागील मुख्य सूत्रधाराचं नाव समोर आलं. या हत्याकांडात वाल्मिक कराडचा हात असल्याचे समोर आल्याने विरोधी पक्षातील नेत्यांसह सत्ताधारी पक्षातील नेत्यांनीही मुंडे यांच्या राजीनाम्याची मागणी केली होती.
वाल्मीक कराड हा धनंजय मुंडे यांचा जवळचा असल्याचे खुद्द मुंडे यांनीच सुरुवातील सांगितले होते. त्यामुळे धनंजय मुंडे यांच्या राजीनाम्याची मागणी झाली होती तसेच वाल्मिक कराड आणि मुंडे यांचे आर्थिक संबंध देखील असल्याचे पुरावे आमदार सुरेश धस, आणि सामाजिक कार्यकर्त्या अंजली दमानिया यांनी दिले होते. यामुळे धनंजय मुंडेंच्या राजीनाम्याची मागणी आणखीनच जोर धरू लागली होती.
दरम्यान, संतोष देशमुख यांच्या हत्या प्रकरणातील आरोपींनी काढलेले फोटो काल आरोपपत्रातून समोर आले होते. या आरोपपत्रातील फोटो सोशल मीडियावर व्हायरल झाल्यानंतर काल रात्री मुख्यमंत्री देवेंद्र फडणवीस आणि उपमुख्यमंत्री अजित पवार यांच्यात बैठक पार पडली. या बैठकीत देवेंद्र फडणवीस यांनी धनंजय मुंडे यांना राजीनामा देण्यास सांगितल्याची महत्वाची माहिती समोर आली होती. या बैठकीत धनंजय मंडे, प्रफुल पटेल आणि सुनील तटकरे उपस्थित होते. या बैठकीनंतर मुंडे यांनी आज आपला राजीनामा फडणवीस यांच्याकडे सोपवला आहे.
