राज्याचे कृषीमंत्री माणिकराव कोकाटे यांना मोठा दिलासा देणारी बातमी आहे. नाशिकच्या जिल्हा सत्र न्यायालयाने त्यांच्यासह त्यांच्या बंधूंच्या शिक्षेला स्थगिती दिली आहे. आज त्यांच्या शिक्षेच्या स्थगिती अर्जावर सुनावणी पार पडली त्यावेळी न्यायालायने हे आदेश दिले आहेत.

कृषिमंत्री माणिकराव कोकाटे व त्यांचे बंधू विजय काेकाटे यांच्या दोन वर्षांच्या शिक्षेला स्थगिती देण्याबाबत राखून ठेवलेल्या निकालाची सुनावणी नुकतीच पार पडली. या सुनावणीत कोकाटे बंधूंना न्यायालयाकडून मोठा दिलासा देण्यात आला आहे.

मुख्यमंत्री कोट्यातून दिल्या जाणाऱ्या सदनिका या बनावट दस्तऐवज तयार करून लाटल्या प्रकरणात कृषीमंत्री ॲड. माणिकराव कोकाटेव त्यांचे भाऊ विजय कोकाटे यांना प्रत्येकी दोन वर्षांचा कारावास आणि 50 हजार रुपये दंडाची शिक्षा नाशिक जिल्हा न्यायालयाने ठोठावली होती. ज्यामध्ये न्यायालयाने दिलासा दिला आहे.

काय आहे प्रकरण?

माणिकराव कोकाटे यांचं हे प्रकरण 1995 ते 1997 दरम्यानचे आहे. माणिकराव कोकाटे आणि त्यांचे भाऊ सुनील कोकाटे यांना सरकारकडून गृहनिर्माण योजनेंतर्गत सदनिका मिळाल्या होत्या. त्यांनी दावा केला होता की त्यांचे उत्पन्न कमी आहे आणि त्यांच्याकडे कोणतेही घर नाही. या आधारावर त्यांना सरकारच्या योजनेंतर्गत सदनिका मिळाली होती. मात्र नंतर अधिकाऱ्यांनी या प्रकरणात अनियमितता असल्याची तक्रार केली.

बनावट दस्तावेजाच्या आधारे अल्प उत्पन्न गटातून शासकीय कोट्यातील सदनिका लाटून शासनाची फसवणूक केल्याप्रकरणी न्यायालयाने ॲड. कोकाटे आणि त्यांचे बंधू विजय कोकाटे यांना 2 वर्षांचा कारावास आणि प्रत्येकी ५० हजार रुपये दंड, अशी शिक्षा सुनावली होती.

1995 मध्ये त्यांच्याविरुद्ध गुन्हा दाखल करण्यात आला होता. माणिकराव कोकाटे यांच्यावर बनावट कागदपत्रे तयार केल्याचा आणि फसवणूक केल्याचा आरोप याचिकेत करण्यात आला होता. माजी मंत्री तुकाराम दिघोळे यांनी ही याचिका दाखल केली होती. हे प्रकरण 1997 पासून न्यायालयात आहे.

दरम्यान, कोकाटे यांच्या शिक्षेला स्थगिती देऊ नये या मागणीसाठी अंजली दिघोळे यांनी याआधी हस्तक्षेप अर्ज दाखल होता. यानंतर शरद शिंदे यांनी देखील हस्तक्षेप अर्ज दाखल केला होता. या प्रकरणी आज म्हणजे 5 मार्च रोजी सुनावणी पार पडली. यामध्ये माणिकराव कोकाटेंना मोठा दिलासा मिळाला आणि त्यांच्या 2 वर्षाच्या शिक्षेला स्थगिती देण्यात आली आहे.