मायक्रोसॉफ्टचे सह-संस्थापक बिल गेट्स यांनी आपल्या भारत दौऱ्यात आज नवी दिल्ली येथे पंतप्रधान नरेंद्र मोदी यांची भेट घेतली तसेच या भेटीदरम्यान त्यांनी पंतप्रधान मोदी यांच्याशी विविध विषयांवर सविस्तर चर्चा केली. यासंदर्भात पंतप्रधान मोदींनी आपल्या एक्स या सोशल मिडिया अकाउंटवरुन बोलताना म्हंटले आहे की नेहमीप्रमाणे बिल गेट्स यांच्याशी एक अद्भुत भेट झाली. येणाऱ्या पिढ्यांसाठी एक चांगले भविष्य घडवण्यासाठी तंत्रज्ञान नवोन्मेष आणि शाश्वतता यासह विविध मुद्यावर आम्ही चारच केली असल्याचे मोदी यांनी सांगितले आहे.
इंस्टाग्रामवरील एका वेगळ्या पोस्टमध्ये, गेट्स यांनीही त्यांच्या संभाषणावर विचारमंथन केले, ज्यामध्ये भारताच्या विकास उद्दिष्टांबद्दल, २०४७ पर्यंत विकसित भारताचे स्वप्न आणि आरोग्य, शेती आणि एआय सारख्या क्षेत्रातील प्रगतीबद्दल चर्चा अधोरेखित केली. त्यांनी स्थानिक आणि जागतिक स्तरावर भारताच्या वाढत्या नवोपक्रमाबद्दल कौतुक व्यक्त केले.
याव्यतिरिक्त, गेट्स यांनी केंद्रीय आरोग्य मंत्री जेपी नड्डा यांची भेट घेतली, जिथे त्यांनी भारत सरकार आणि बिल अँड मेलिंडा गेट्स फाउंडेशनमधील चालू भागीदारीचा आढावा घेतला.
नड्डा यांनीही सोशल मीडियावर पोस्ट करत म्हंटले आहे कि आज बिल अँड मेलिंडा गेट्स फाउंडेशनचे संस्थापक बिल गेट्स यांची भेट घेतली. फाउंडेशनसोबतच्या आमच्या सहकार्यातून भारताने आरोग्यसेवेत, विशेषतः माता आरोग्य, लसीकरण आणि स्वच्छता क्षेत्रात मिळवलेल्या उल्लेखनीय प्रगतीबद्दल आम्ही चर्चा केली.
