Kunal Kamra: स्टँडअप कॉमेडियन कुणाल कामराने एकनाथ शिंदेंविरोधात केलेल्या एका गाण्यावरुन राज्यात नवा वाद निर्माण झाला आहे. कुणाल कामराने स्टँड अप कॉमेडीमध्ये महाराष्ट्रातील राजकारणावर भाष्य करताना एकनाथ शिंदे(Eknath Shinde) यांच्यावर व्यंगात्मक टीका केली आहे. या प्रकरणामुळे राजकीय वातावरण चांगलेच तापले आहे.
आता या प्रकरणावरती मुख्यमंत्री देवेंद्र फडणवीस (Devendra Fadnvis) यांची प्रतिक्रिया समोर आली आहे. तुम्ही स्टॅण्डअप कॉमेडी करा. मात्र, अपमानित करण्याचे काम कोणी करत असेल, तर ते सहन केले जाणार नाही, यावर योग्य ती कायदेशीर कारवाई केली जाईल, असा इशार फडणवीसांनी दिला आहे. तसेच कुणाल कामराने माफी मागितली पाहिजे, असेही फडणवीस म्हणाले.
महाराष्ट्रातील जनतेने २०२४ मध्ये कोण गद्दार आणि कोण खुद्दार? हे दाखवून दिलेले आहे,हे कुणाल कामराला हे माहिती पाहीजे. हिंदूहृदयसम्राट बाळासाहेब ठाकरे यांची विरासत कोणाकडे गेली? ,हे जनतेने दाखवून दिलेले आहे. त्यामुळे अशा प्रकारे कॉमेडीच्या माध्यमातून एकनाथ शिंदेंचा अनादर करण्याचा अधिकार कोणालाही नाही, हे चुकीचे आहे, असे देखील देवेंद्र फडणवीस म्हटले आहेत.
दरम्यान, कुणाल कामराने एका गाण्यामध्ये एकनाथ शिंदेचे नाव न घेता त्यांना गद्दार म्हटले आहे. घराणेशाही संपवण्यासाठी त्यांनी कुणाचातरी बाप चोरला. शिंदे मंत्री नाहीत तर हे दलबदलू आहेत. मंत्रालयापेक्षा जास्त हे तर देवेंद्र फडणवीस यांच्या मांडीवरच जास्त असतात अशा शब्दात कुणाल कामरालाने शिंदेवर टीका केली होती.
