मुंबई : दिवंगत बॉलिवूड अभिनेता सुशांत सिंह राजपूत याची प्रसिद्धी प्रमुख दिशा सालियन हिचा अपघाती मृत्यू झाला होता. पण दिशाचा मृत्यू हा अपघाती नसून तिच्यावर बलात्कार करुन तिची हत्या करण्यात आल्याचा गंभीर आरोप करत वडिल सतिश सालियन यांनी उच्च न्यायालयात याचिका दाखल केली आहे. तसेच, याप्रकरणाची पुन्हा चौकशी करण्यात यावी, अशी मागणीही त्यांनी याचिकेतून केली आहे.
त्याच दिशेने तपास व्हावा म्हणून आज दिशा सालियनचे वडिल सतिश सालियन यांच्यासह या प्रकरणात सालियन यांची बाजू मांडणरे वकील अँड. निलेश ओझा यांनी आज मुंबईत पोलीस आयुक्तालयात जाऊन वरिष्ठ अधिकाऱ्यांची भेट घेतली. या भेटीनंतर त्यांनी माध्यमांशी संवाद साधताना पुन्हा एकदा शिवसेना उबाठा पक्षाचे नेते व आमदार आदित्य ठाकरे यांच्यासह त्यांचे वडिल माजी मुख्यमंत्री उद्धव ठाकरे यांच्यावर देखील गंभीर आरोप केले आहेत.
वकील ओझा यांनी माध्यमांशी बोलताना सांगितले की, नार्कोटेक्स ब्युरोच्या तपासात हे आढळून आलंय आदित्य ठाकरे हे ड्रग्स बिझनेसमध्ये सहभागी आहेत. त्यासंदर्भाती इतंभूत माहिती आम्ही या अर्जात दिली आहे. आदित्य ठाकरे, दिनो मोरिया यांच्या फोन कॉल्ससह समीर खान नावाच्या व्यक्तीची डीएफीपी नावाची कंपनी होती,जी ड्रग्सचे सिंडिकेट चालवत होती. तसेच आदित्य ठाकरे यांचं नाव ड्रग्सच्या बिझनेसमध्ये आल्यानंतर समीर वानखेडे असो किंवा नार्कोटेक्स ब्युरोचे इतर अधिकारी असतील, त्यांना आदित्य ठाकरेंवर कारवाई करण्यासाठी कोणी थांबवलं ? असा सवाल ओझा यांनी विचारला आहे. तसेच या प्रकरणामध्ये, किती कोटींची डील झाली ? असाही सवाल ओझा यांनी विचारला आहे. पोलिस आयुक्तालयात आमची जॉईंट सेक्रेटरी यांच्यासोबत चर्चा झाली, त्यानंतर त्यांनी पोलीस आयुक्तांशी फोनवरुन चर्चा करुन संबंधित प्रकरणात ही तक्रार दाखल करुन घेत असल्याचे म्हटले. त्यानुसार, आता एफआयआर दाखल झाल्याचेही ओझा यांनी सांगितले. आमच्या तक्रारीत आदित्य ठाकरे आणि उद्धव ठाकरे दोघेही आरोपी आहेत, अशी माहिती निलेश ओझा यांनी दिली.
दरम्यान, दिशा सालियन प्रकरणात निलेश ओझा यांनी आमदार आदित्य ठाकरे यांच्यासह अभिनेता दिनो मोरिया, सूरज पांचोली आणि माजी पोलीस अधिकारी परमबीर सिंग यांच्यावरही गंभीर आरोप केले आहेत.
