Kunal Kamra: स्टँडअप कॉमेडियन कुणाल कामराने स्टँड अप कॉमेडीमध्ये महाराष्ट्रातील राजकारणावर भाष्य करताना एकनाथ शिंदे (Eknath Shinde) यांच्यावर व्यंगात्मक टीका केली होती. त्यांनतर शिवसैनिक आक्रमक झाले होते आणि या प्रकरणात कुणाल कामराला अटक करण्याची मागणी शिवसेनेच्या नेत्यांकडून केली जात आहे.

परंतु यापूर्वी मद्रास उच्च न्यायालयाने कुणाल कामराला अटकपूर्व जामीन मंजूर करत ७ एप्रिलपर्यंत अटकेपासून संरक्षण अदिले होते. त्यामुळे आज त्याची अटकेपासून संरक्षणाची ही मुदत संपली होती. यानंतर आता मद्रास उच्च न्यायालयाने कुणाल कामराला पुन्हा एकदा मोठा दिलासा दिला आहे. कुणाल कामराला मद्रास उच्च न्यायालयाने दिलेला अंतरिम अटकपूर्व जामीन आता १७ एप्रिलपर्यंत वाढवला आहे.

तर दुसरीकडे कुणाल कामरा त्याच्यावरील एफआयआर रद्द करण्याच्या मागणीसाठी मुंबई हायकोर्टातही गेला होता. त्याने ५ एप्रिल रोजी एफआयर रद्द करण्यासाठी हायकोर्टात याचिकाही दाखल केली आहे. एफआयआरची वैधता, अचूकता आणि योग्यतेला आव्हान देत कामराने एफआयआर रद्द करण्याची मागणी करणारी याचिका मुंबई उच्च न्यायालयात दाखल केली आहे. त्यामुळे न्यायालय यावरती का निर्णय देते याकडे सर्वांचे लक्ष लागले आहे.

दरम्यान, कुणाल कामराने एका गाण्यामध्ये एकनाथ शिंदेचे नाव न घेता त्यांना गद्दार म्हटले आहे. घराणेशाही संपवण्यासाठी त्यांनी कुणाचातरी बाप चोरला. शिंदे मंत्री नाहीत तर हे दलबदलू आहेत. मंत्रालयापेक्षा जास्त हे तर देवेंद्र फडणवीस यांच्या मांडीवरच जास्त असतात अशा शब्दात कुणाल कामरालाने शिंदेवर टीका केली होती.