आमिर खानची लेक मराठमोळ्या नुपूर शिखरेसोबत अडकली लग्नबंधनात, सोशल मीडियावर फोटो होत आहेत व्हायरल

Ira Khan-Nupur Shikhare Wedding : बॉलिवूडचा प्रसिद्ध अभिनेता आमिर खानची (Aamir Khan) लाडकी लेक आयरा खान (Ira Khan) लग्नबंधनात अडकली आहे. आयरा खानने तिचा मराठमोळा प्रियकर नुपूर शिखरेसोबत (Nupur Shikhare) लग्नगाठ बांधली आहे. त्या दोघांनी कोर्ट मॅरेज केलं असून सध्या त्यांच्या या रजिस्टर मॅरेजचे फोटो सोशल मीडियावर मोठ्या प्रमाणात व्हायरल होत आहेत.

आयरा आणि नुपूरने मुंबईतील ताज लँड्स एंड या पंचतारांकित हॉटलमध्ये रजिस्टर मॅरेज केले आहे. यावेळी खान आणि शिखरे कुटुंबीय उपस्थित होते. तसेच आयरा-नूपुर येत्या 10 जानेवारीला उदयपूरमध्ये पारंपारिक पद्धतीने लग्नगाठ बांधणार आहेत. तर त्यांच्या या शाही विवाहसोहळ्याची सुरूवात 8 जानेवारीपासून होणार आहे. 

उदयपूरमध्ये आयरा-नुपूरचा शाही विवाहसोहळा पार पडल्यानंतर 13 जानेवारीला मुंबईमध्ये बॉलिवूड सेलिब्रिटी आणि मित्रमंडळींसाठी एक भव्य रिस्पेशन पार्टी आयोजित करण्यात आली आहे.  

तसेच आज लग्नादरम्यान आयरा आणि नुपूरच्या लूकने सर्वांचेच लक्ष वेधून घेतले आहे. लग्नात आयराने सुंदर असा लेहेंगा परिधान केला होता ज्यामध्ये ती खूपच सुंदर दिसत होती. तर नुपूर हा एकदम हटके लूकमध्ये दिसला. नुपूर हा जिम ट्रेनर आहे त्यामुळे तो जिमच्या कपड्यांमध्ये जॉगिंग करत त्याच्या मित्रांसोबत लग्नाची मिरवणून घेऊन ताज लँड्स एंडच्या बाहेर पोहोचला होता. त्यावेळी त्याने ढोल-ताशांच्या तालावर चांगलाच ठेका धरला. सध्या त्याचा हा डान्स व्हिडीओ सोशल मीडियावर मोठ्या प्रमाणात व्हायरल होत आहे.