सोलापूर : आज (19 जानेवारी) पंतप्रधना नरेंद्र मोदी हे सोलापूर दौऱ्यावर आहेत. यावेळी पंतप्रधान मोदींनी सोलापूरच्या नगर कुंभारी येथील पंतप्रधान आवास योजनेअंतर्गत असंघटित कामगारांसाठी बांधण्यात आलेल्या घरकुलांचे लोकार्पण केले. दरम्यान, सभेला संबोधित करताना पंतप्रधान नरेंद्र मोदी भावूक झाल्याचे पाहायला मिळाले.
भाषणादरम्यान पंतप्रधान मोदी भावनिक झाले होते. ते म्हणाले की, आज 1 लाखांहूक अधिक परिवारांचा गृह प्रवेश होणार आहे. आम्ही जो संकल्प केला होता तो आज पूर्ण होत आहे. देशातील सर्वात मोठ्या सोसायटीचे लोकार्पण झाले आहे. मलाही अशा हक्काच्या घरात राहायला मिळायला हवे होते, असे म्हणत मोदींना अश्रू अनावर झाले आणि ते भावनिक झाले.
तसेच आज मी स्वत: तुमच्या घराची चावी देण्यासाठी आलो आहे. तर आज मोदींनी एक गॅरंटी पूर्ण केली आहे. मोदींची गॅरंटी म्हणजे ती गॅरंटी पूर्ण होण्याची गॅरंटी आहे, असेही मोदी म्हणाले.
पुढे ते म्हणाले की, मी पंढरपूरच्या विठ्ठलाला आणि सिद्धेश्वर महाराज यांना नमन करतो. 22 जानेवारीला ऐतिहासिक क्षण येणार आहे, आपले भगवान श्री राम आपल्या मंदिरात विराजमान होणार आहेत. तसेच तुमच्या सर्वांच्या आशीर्वादाने मी 11 दिवस साधना करणार आहे. तुम्हा सर्वांच्या आशिर्वादाने मी अयोध्येत जाणार आहे, असेही मोदी म्हणाले.
