शिवसेनाप्रमुख दिवंगत बाळासाहेब ठाकरेंच्या जयंतीनिमित्त पंतप्रधान नरेंद्र मोदींनी त्यांच्या स्मृतींना उजाळा देत अभिवादन केलेय. यासंदर्भात पंतप्रधानांनी ट्विटरवर पोस्ट लिहून आपल्या भावना व्यक्त केल्या आहेत.
आपल्या ट्विटर संदेशात मोदी म्हणाले की, बाळासाहेब ठाकरे यांना जयंतीनिमित्त विनम्र अभिवादन. ते एक उत्तुंग व्यक्तिमत्त्व होते ज्यांचा महाराष्ट्राच्या राजकीय आणि सांस्कृतिक पटलावर पडलेला प्रभाव अतुलनीय आहे. असंख्य लोकांच्या हृदयात त्यांच्या नेतृत्वामुळं, त्यांच्या आदर्शांप्रती अखंड समर्पण आहे. तसेच गरीब आणि दलितांसाठी काम करण्यासाठी ते कायम वचनबद्ध राहिले, असेही मोदींनी आपल्या संदेशात नमूद केले आहे. बाळासाहेब ठाकरेंची आज 98 वी जयंती आहे. यानिमित्त राज्यात शिवसेनेच्यावतीने विविध कार्यक्रमांचे आयोजन करण्यात आलं आहे. उद्धव ठाकरेंच्या गटाचा आज नाशिकच्या सातपूरमध्ये अधिवेशन पार पडणार आहे. तसेच संध्याकाळी गोल्फ मैदानात सभा होणार आहे.
