काल (6 फेब्रुवारी) अजित पवार गटाला राष्ट्रवादी पक्ष आणि चिन्ह देण्याचा निर्णय केंद्रीय निवडणूक आयोगाने घेतला आहे. या निकालानंतर शरद पवारांना मोठा धक्का बसला आहे. तर दुसरीकडे अजित पवार गटाकडून मोठा जल्लोष केला जात आहे. तसेच राष्ट्रवादीच्या या निकालावर राजकीय वर्तुळातून अनेक वेगवेगळ्या प्रतिक्रिया येत आहेत. अशातच आता मराठमोळी अभिनेत्री तेजस्विनी पंडितने एक ट्विट केले आहे ज्याने सर्वांचेच लक्ष वेधले आहे.
तेजस्विनी पंडीतने X वर एक पोस्ट शेअर केली आहे. “जनता मूर्ख नाही. सगळे जाणते. बेईमानी ओळखते. लक्षात ठेवणे”, असे ट्विट तेजस्विनीने केले आहे. या ट्विटमध्ये तिने कोणाचेही नाव घेतलेले नाही. त्यामुळे तिचा रोख नेमका कोणाकडे आहे? हे समजू शकलेले नाही.
राष्ट्रवादीच्या निकालानंतर तेजस्विनीने हे ट्विट केल्यामुळे ते सोशल मीडियावर चांगलेच व्हायरल होत आहे. तसेच तिच्या या ट्विटने सर्वांचे लक्ष वेधून घेतले असून त्यावर नेटकऱ्यांनी मोठ्या प्रमाणात कमेंट्स केल्या आहेत.
दरम्यान, तेजस्विनी पंडित ही अनेकदा तिच्या रोखठोख भूमिकेमुळे चर्चेत येत असते. बऱ्याचदा ती सामाजिक विषयांवर आपली मते मांडताना दिसते. तसेच काहीवेळा नेटकरी तिला मोठ्या प्रमाणात ट्रोल देखील करत असतात. तर आता तेजस्विनी पुन्हा एकदा चर्चेत आली असून सोशल मीडियावर तिच्या ट्विटची चर्चा सुरू आहे.
