पंतप्रधान नरेंद्र मोदी हे गुजरात दौऱ्यावर आहेत. तसेच त्यांचा आज दुपारी राज्याच्या नवसारी जिल्ह्यात मेगा रोड शो आयोजित केला होता. यावेळी नवासारीच्या स्थानिक जनतेने त्यांचे जंगी स्वागत केले. पंतप्रधानांच्या स्वागतासाठी आणि जल्लोष करण्यासाठी असंख्य लोक जमले होते.
पंतप्रधानांचे स्वागत करण्यासाठी आणि त्यांची एक झलक पाहण्यासाठी नवसारीतील लहान मुले, तरुण आणि वृद्धांसह हजारो प्रेक्षक रोड शोमध्ये सहभागी झाले होते. या रोड शो दरम्यान पंतप्रधान मोदींसोबत गुजरातचे मुख्यमंत्री भूपेंद्र पटेल आणि नवासारीचे खासदार सीआर पाटील उपस्थित होते.
या रोड शोनंतर व्यासपीठावर गुजरातचे मुख्यमंत्री भूपेंद्र पटेल आणि नवसारीचे खासदार यांनी पंतप्रधानांचे स्वागत केले आणि त्यांना पुष्पहार आणि स्मृतिचिन्ह प्रदान केले.
तसेच पंतप्रधान नरेंद्र मोदी गुजरातमधील नवसारी येथे विविध प्रकल्पांचे उद्घाटन, लोकार्पण आणि पायाभरणी करणार आहेत. या प्रकल्पांमध्ये रस्ते, रेल्वे, ऊर्जा, आरोग्य, इंटरनेट कनेक्टिव्हिटी, शहरी विकास, पाणीपुरवठा आणि पर्यटन यासारख्या महत्त्वाच्या क्षेत्रांचा समावेश असणार आहे.
