अभिनेत्री तापसी पन्नू लवकरच लग्नबंधनात अडकणार असल्याची माहिती समोर आली आहे. तापसी तिचा प्रियकर मॅथियास बोई याच्यासोबत लग्न करणार आहे. मीडिया रिपोर्ट्सनुसार, तापसी मॅथियास बोईसोबत 10 वर्षांपासून रिलेशनशिपमध्ये आहे.
तापसीने तिच्या लग्नासाठी उदयपूरचे ठिकाण निवडले आहे. तापसी आणि मॅथियास हे दोघे शीख आणि ख्रिश्चन रितीरिवाजानुसार लग्न करणार आहेत. तसेच त्यांच्या लग्नसोहळ्यात फक्त तापसी आणि मॅथियास कुटुंबीयच उपस्थित राहणार आहेत. मिळालेल्या माहितीनुसार, बॉलिवूड सेलिब्रिटींना तापसी आणि मॅथियासच्या लग्नासाठी अद्याप आमंत्रित करण्यात आलेले नाही.
तापसी पन्नू आणि मॅथियास गेल्या 10 वर्षांपासून एकमेकांना डेट करत आहेत. तापसी अनेकदा मॅथियाससोबतचे फोटो आणि व्हिडिओ सोशल मीडियावर पोस्ट करत असते. तसेच अद्याप तापसी पन्नू आणि मॅथियासने त्यांच्या लग्नाबाबतची कोणतीही अधिकृत घोषणा केलेली नाही.
दरम्यान, 43 वर्षीय मॅथियास हा डेन्मार्कचा लोकप्रिय बॅडमिंटनपटू आहे. तो बॅडमिंटनपटू म्हणून युरोपियन चॅम्पियन आणि ऑलिम्पिक पदक विजेता आहे. मॅथियासने 2020 मध्ये बॅडमिंटनमधून निवृत्ती घेतली होती.
तापसी हिच्या करियरबद्दल सांगायचे झाल्यास, तापसी पन्नूने हिंदी इंडस्ट्रीसोबतच तेलुगू आणि तमिळ इंडस्ट्रीमध्ये काम केले आहे. तापसीने 2010 साली ‘झुम्मंडी नादम’ या तेलुगू चित्रपटातून अभिनय क्षेत्रात पदार्पण केले होते. तिने आपल्या करिअरची सुरुवात मॉडेलिंगपासून केली होती. 2013 मध्ये ‘चश्मे बद्दूर’ मधून तिने बॉलिवूडमध्ये पदार्पण केले. तसेच तापसीच्या बॉलिवूड चित्रपटांबद्दल बोलायचे झाले तर तिने ‘जुडवा 2’, ‘बदला’, ‘नाम शबाना’, ‘पिंक’ आणि ‘शाबाश मिठू’ असे अनेक चित्रपट केले आहेत.
