आज पंतप्रधान नरेंद्र मोदी यांनी झारखंडमध्ये 35,700 कोटी रुपयांच्या अनेक प्रकल्पांचे उद्घाटन आणि पायाभरणी केली आहे. पंतप्रधानांनी धनबाद जिल्ह्यातील सिंद्री येथे 8,900 कोटी रुपयांहून अधिक खर्च करून विकसित केलेला हिंदुस्तान फर्टिलायझर्स अँड केमिकल्स लिमिटेड (HURL) चा खत प्रकल्प राष्ट्राला समर्पित केला.
या प्लांटमुळे देशातील स्वदेशी युरिया उत्पादनात दरवर्षी अंदाजे 12.7 LMT (लाख मेट्रिक टन) वाढ होईल ज्यामुळे देशातील शेतकऱ्यांना फायदा होणार आहे.
गोरखपूर आणि रामागुंडम येथील खतनिर्मिती संयंत्रांच्या फेरबदलानंतर देशात पुन्हा सुरू होणारा हा तिसरा खत कारखाना आहे. पंतप्रधानांनी डिसेंबर 2021 मध्ये गोरखपूर येथील खत संयंत्रे आणि नोव्हेंबर 2022 मध्ये रामागुंडम येथील खत संयंत्रे राष्ट्राला समर्पित केली होती. पंतप्रधान मोदींनी झारखंडमध्ये 26,000 कोटी रुपयांपेक्षा जास्त किमतीचे रेल्वे, वीज आणि कोळसा प्रकल्पही लॉन्च केले. यामध्ये देवघर-दिब्रुगड ट्रेन सेवा, टाटानगर आणि बदमपहार दरम्यान मेमू ट्रेन सेवा आणि शिवपूर स्टेशनवरून लांब पल्ल्याच्या मालगाडीचा समावेश आहे.
यानंतर पंतप्रधान मोदींनी जाहीर सभेला संबोधित केले. ते म्हणाले की, आज येथे सिंद्री खत कारखान्याचे उद्घाटन करण्यात आले. हा खास कारखाना मी सिंद्री येथे नक्कीच सुरू करेन, असा संकल्प मी केला होता. ही मोदींची हमी होती आणि आज ही हमी पूर्ण झाली आहे. मी 2018 मध्ये या खत संयंत्राच्या पायाभरणीसाठी आलो होतो. आज फक्त सिंद्री कारखानाच सुरू झाला नाही तर हजारो नवीन रोजगाराच्या संधीही सुरू झाल्या आहेत.
भारत युरियाच्या बाबतीत आत्मनिर्भर होण्याच्या दिशेने वेगाने वाटचाल करत आहे. यामुळे परकीय चलन तर वाचेलच, पण तो पैसा शेतकऱ्यांच्या हितासाठीही खर्च करता येईल. गेल्या 10 वर्षात आम्ही आदिवासी समाज, गरीब, तरुण आणि महिलांना आमचे सर्वोच्च प्राधान्य देऊन झारखंडसाठी काम केले आहे, असेही पंतप्रधान मोदी म्हणाले.
हिंदुस्तान फर्टिलायझर्स अँड केमिकल्स लिमिटेड (HURL) चा सिंद्री फर्टिलायझर प्लांट 8900 कोटी रुपयांपेक्षा जास्त खर्च करून विकसित करण्यात आला आहे. युरिया क्षेत्रातील स्वावलंबनाच्या दिशेने टाकलेले हे पाऊल आहे.
