सुदीप्तो सेन दिग्दर्शित ‘द केरळ स्टोरी’ हा चित्रपट गेल्या वर्षी सुपरहिट ठरला होता. या चित्रपटामुळे अभिनेत्री अदा शर्मा चांगलीच प्रसिद्धीझोतात आली. त्यानंतर आता अदा शर्मा पुन्हा एकदा एक नवीन धमाकेदार कथा घेऊन परतली आहे. यावेळी ती ‘बस्तर: द नक्सल स्टोरी’ या चित्रपटातून नक्षलवाद्यांना धडा शिकवताना दिसणार आहे.
अदा शर्माचा ‘बस्तर: द नक्सल स्टोरी’ हा आगामी चित्रपट ‘द केरळ स्टोरी’चे निर्माते विपुल अमृतलाल शाह यांनी निर्मित केला आहे. तर चित्रपटाचे दिग्दर्शन सुदिप्तो सेन यांनी केले आहे. काही दिवसांपूर्वीच या चित्रपटाचा टीझर प्रदर्शित झाला होता. त्यानंतर आता या चित्रपटाचा जबरदस्त असा ट्रेलर रिलीज झाला आहे, जो तुम्हाला थक्क करेल.
या चित्रपटात अदा शर्मा धाडसी आयपीएस अधिकारी नीरजा माधवनची भूमिका साकारत आहे, जी नक्षलवाद्यांचा खात्मा करण्यासाठी एकटी लढते. तसेच या चित्रपटाची कथा एका सत्य घटनेवर आधारित आहे.
‘बस्तर: द नक्सल स्टोरी’ चित्रपटाचा ट्रेलर थरकाप उडवणारा आहे. यामध्ये दहशतवादाविरुद्धचे युद्ध दाखवण्यात आले आहे. 76 शहीद सीआरपीएफ जवानांच्या हौतात्म्याची कहाणी आणि त्यांचा बदला या ट्रेलरमध्ये दाखवण्यात आला आहे.
या चित्रपटाच्या ट्रेलरला सध्या प्रेक्षकांचे भरभरून प्रेम मिळत आहे. सर्वजण अदा शर्माचे कौतुक करत आहेत. विपुल अमृतलाल निर्मित हा चित्रपट 15 मार्च रोजी चित्रपटगृहात प्रदर्शित होणार आहे. तर या चित्रपटात अदासोबत सोनिया बालानी, योगिता बिहाणी आणि सिद्धी इदनानी यांनी देखील प्रमुख भूमिका साकारल्या आहेत.
