ईडीने सोमवारी सपा नेते आणि माजी आमदार विनय शंकर तिवारी यांच्या गंगोत्री एंटरप्रायझेसची 30.86 कोटी रुपयांची मालमत्ता जप्त केली आहे. बँकांच्या 754 कोटी रुपयांच्या गैरव्यवहार प्रकरणी ईडीने ही कारवाई केली आहे.
ईडीने लखनौ, नोएडा आणि गोरखपूरमधील मालमत्ता जप्त केल्या आहेत, ज्या या प्रकरणातील मुख्य आरोपी, रीटा तिवारी, गंगोत्री एंटरप्रायझेस, रॉयल एम्पायर मार्केटिंग प्रायव्हेट लिमिटेड, कंदर्प कन्स्ट्रक्शन प्रायव्हेट लिमिटेड यांच्या नावावर नोंदणीकृत आहेत. रिटा तिवारी या माजी आमदार विनय शंकर तिवारी यांच्या पत्नी आहेत.
ईडीच्या म्हणण्यानुसार, गंगोत्री एंटरप्रायझेसचे संचालक, प्रवर्तक आणि जामीनदार यांनी एकमेकांच्या संगनमताने बँकांनी दिलेल्या 754 कोटी रुपयांच्या कॅश क्रेडिट मर्यादेचा घोटाळा केला होता. यामध्ये विनय शंकर तिवारी, रीता तिवारी, अजित कुमार पांडे यांच्या प्रमुख भूमिका समोर आल्या. त्यानंतर तीन शहरातील त्यांच्या व्यावसायिक, निवासी आणि शेतजमिनी जप्त करण्यात आल्या आहेत.
बँकांच्या तक्रारीवरून सीबीआयने या प्रकरणी गुन्हा दाखल केला होता, त्या आधारे ईडीनेही सीबीआय एफआयआरमध्ये नाव असलेल्या आरोपींविरुद्ध मनी लाँड्रिंगचा गुन्हा नोंदवून तपास सुरू केला होता.
गंगोत्री एंटरप्रायझेसने बँक ऑफ इंडियाच्या नेतृत्वाखालील सात बँकांच्या कन्सोर्टियमकडून 1129.44 कोटी रुपयांची कॅश क्रेडिट लिमिट घेतल्याचे तपासात समोर आले आहे. नंतर ते गंगोत्री एंटरप्रायझेसच्या उपकंपन्यांकडे वळवण्यात आले आणि खाजगी मालमत्ता खरेदी करण्यात आल्या. या प्रकरणात, ईडीने 23 फेब्रुवारी रोजी विनय शंकर तिवारी आणि त्याच्या जवळच्या नातेवाईकांच्या 10 ठिकाणी छापे टाकले होते, जिथे बँकेच्या पैशाने खरेदी केलेल्या सर्व मालमत्तेची कागदपत्रे जप्त करण्यात आली होती. या प्रकरणात ईडीने विनय शंकर तिवारी आणि त्यांच्या जवळच्या नातेवाईकांची सुमारे 103 कोटी रुपयांची मालमत्ता जप्त केली आहे.
