नुकतीच एक मोठी घटना घडली आहे. काँग्रेसचे प्रदेशाध्यक्ष नाना पटोले (Nana Patole) यांच्या गाडीचा भीषण अपघात (Accident) झाला आहे. प्रचार करून परतत असताना नाना पटोले यांच्या गाडीला एका भरधाव ट्रकने धडक दिल्याने हा अपघात झाला आहे. ही घटना भंडाऱ्यात घडली आहे. तर अपघातामध्ये नाना पटाले थोडक्यात बचावले आहेत.
काल (9 एप्रिल) रात्रीच्या सुमारास प्रचारानंतर सुकाळी या गावी जात असताना नाना पटोले यांच्या गाडीला मागून येणाऱ्या एका ट्रकने जोरात धडक दिली. या अपघातामध्ये गाडीचे मोठ्या प्रमाणात नुकसान झाले आहे. तर यामध्ये सुदैवाने कोणतीही जिवीतहानी झालेली नाही.
नाना पटोले हे ज्या गाडीत बसले होते त्या गाडीच्या मागच्या भागाचा चुराडा झाला आहे. मात्र, सुदैवानं या अपघातात नाना पटोले यांना आणि गाडीतील इतर कोणालाही दुखापत झालेली नाही. तर या अपघाताची माहिती तातडीनं पोलिसांना देण्यात आली. त्यानंतर पोलीस घटनास्थळी दाखल झाले आणि त्यांनी हा घटनेचा अधिक तपास सुरू केला आहे.
या अपघाताचे कारण अद्याप अस्पष्ट आहे. मात्र, हा अपघात चालकाचं ट्रकवरील नियंत्रण सुटल्यामुळे झाला असावा असा प्राथमिक अंदाज वर्तवला जात आहे.
