लोकसभा निवडणुकीसाठी राष्ट्रवादी काँग्रेस – शरदचंद्र पवार पक्षाकडून तिसरी यादी जाहीर करून आणखी दोन उमेदवारांची घोषणा केली. यात साताऱ्यातून शशिकांत शिंदेंना आणि रावेरमधून श्रीराम पाटलांना उमेदवारी जाहीर करण्यात आली आहे. यामुळे शरद पवार गटाच्या वाट्याला आलेल्या एकूण १० पैकी ९ जागांवरील उमेदवार निश्चित झाले आहेत. दरम्यान माढा लोकसभा मतदारसंघाचा सस्पेन्स अद्याप कायम आहे.
शरद पवार गटाकडून तिसरी यादी ट्विटर हँडलवरुन जाहीर करण्यात आली आहे. या ट्वीटमध्ये म्हटलंय की, “तुतारीच्या साथीने महाराष्ट्राचा आवाज दिल्लीत अधिक बुलंद करण्यासाठी ‘राष्ट्रवादी काँग्रेस पार्टी – शरदचंद्र पवार’ पक्षाच्या केंद्रीय संसदीय मंडळानं लोकसभा निवडणूक 2024 ची तिसरी उमेदवार यादी जाहीर केली आहे. चला, आदरणीय खा. शरदचंद्रजी पवार साहेबांच्या सोबतीने सेवा-सन्मान आणि स्वाभिमानी विचारांचा वारसा प्रखर करूया!”
