पंतप्रधान नरेंद्र मोदी (PM Narendra Modi) यांनी आज (12 एप्रिल) उधमपूरमध्ये (Udhampur) केंद्रीय मंत्री आणि भारतीय जनता पक्षाचे (BJP) उमेदवार जितेंद्र सिंह यांच्या बाजूने निवडणूक रॅलीला संबोधित केले. यादरम्यान पंतप्रधान मोदी म्हणाले की, ती वेळ दूर नाही जेव्हा जम्मू-काश्मीरमध्ये विधानसभा निवडणुका होतील आणि राज्याचा दर्जा बहाल केला जाईल.
जितेंद्र सिंह हे उधमपूर लोकसभा मतदारसंघातून सलग तिसऱ्यांदा निवडणूक लढवत आहेत. लोकसभा निवडणुकीच्या पहिल्या टप्प्यात 19 एप्रिल रोजी येथे मतदान होणार आहे. पंतप्रधान मोदी यांचा दीड महिन्यांहून अधिक काळातील जम्मू-काश्मीरचा हा तिसरा दौरा आहे. यापूर्वी त्यांनी अनेक विकास प्रकल्पांचे उद्घाटन केले होते आणि 20 फेब्रुवारी आणि 7 मार्च रोजी जम्मू आणि श्रीनगरमध्ये सभांना संबोधित केले होते.
सभेला संबोधित करताना पंतप्रधान मोदींनी विरोधकांवर जोरदार हल्लाबोल केला. विरोधी पक्षांवर टीका करताना पीएम मोदी म्हणाले की, ते म्हणायचे की 370 हटवली तर आग लागेल, जम्मू-काश्मीर आम्हाला सोडून जाईल. मात्र जम्मू-काश्मीरच्या तरुणांनी त्यांना आरसा दाखवला. आता बघा, जेव्हा त्यांनी इथे काम केले नाही, तेव्हा जम्मू-काश्मीरच्या लोकांना त्यांचे वास्तव कळले, मग हे लोक आता जम्मू-काश्मीरच्या बाहेर देशातील लोकांमध्ये संभ्रम पसरवण्याचा खेळ खेळत आहेत. कलम 370 रद्द केल्याने देशाला कोणताही फायदा झाला नसल्याचे त्यांचे म्हणणे आहे.
जम्मू-काश्मीरला पुन्हा राज्याचा दर्जा मिळेल, असे पंतप्रधान मोदी म्हणाले. जम्मू-काश्मीरमध्येही विधानसभेच्या निवडणुका होतील ती वेळ दूर नाही. तुम्ही तुमची स्वप्ने तुमच्या आमदार, तुमच्या मंत्र्यांसोबत शेअर करू शकाल. 10 वर्षांत जम्मू-काश्मीर पूर्णपणे बदलले आहे. रस्ते, वीज, पाणी, प्रवास, स्थलांतर, हे सगळे आहे. पण सर्वात मोठी गोष्ट म्हणजे जम्मू-काश्मीरने आपला विचार बदलला आहे. निराशेतून आशेकडे वाटचाल केली आहे, जीवन पूर्णपणे विश्वासाने भरलेले आहे. एवढा विकास इथे झाला आहे, असेही पंतप्रधान मोदी म्हणाले.
