अभिनेता सलमान खानच्या घराबाहेर गोळीबार करणाऱ्या दोन्ही हल्लेखोरांना मुंबई पोलिसांनी अटक केली आहे. गुजरातच्या भूज भागातून विकी गुप्ता आणि सागर पाल अशी अटक केलेल्यांची नावे आहेत. प्राथमिक चौकशीत दोघांनीही गुन्ह्याची कबुली दिली आहे.
मुंबई पोलिसांच्या क्राईम ब्रांचने दोन आरोपींना सोमवारी रात्री (१५ एप्रिल) उशिरा गुजरातमधील भूजमधून अटक केल्याची पुष्टी केली आहे.
मिळालेल्या माहितीनुसार हल्लेखोरांचा लॉरेन्स बिश्नोई गँगशी संबंध असल्याचा पोलिसांना संशय आहे. काही हजार रुपयांसाठी सलमान खानच्या घराबाहेर गोळीबार केल्याची कबुली या दोघांनी चौकशीत दिली. गोळीबार करण्याआधी दोघांनी सलमान खानच्या घराची रेकी केली होती. पकडले जाऊ नये यासाठी त्यांनी मध्यरात्री देखील सलमानच्या घराची रेकी केली होती. सलमानच्या घराबाहेर रात्री उशीरापर्यंत चाहत्यांची गर्दी असल्याने पहाटे गोळीबार करण्याचा प्लॅन त्यांनी आखला होता. या प्लॅननुसारच त्यांनी हा गोळीबार केला. गोळीबारानंतर दोघेही गुजरातला पळून गेले होते. मात्र, अखेर मुंबई पोलिसांनी तांत्रिक तपासाच्या आधारे दोन्ही हल्लेखोरांना अटक केली आहे.
रविवारी पहाटे ४.३० वाजण्याच्या सुमारास सलमान खानच्या वांद्र्यातल्या गॅलेक्सी अपार्टमेंटच्या बाहेर बाईकवरून आलेल्या दोघांनी पाच ते सहा राऊंड फायर केले. यातली एक गोळी सलमान खानच्या गॅलरीवरही झाडण्यात आली. बाईकवर आलेल्या या दोघांनी हेल्मेट घातल्यामुळे त्यांचा चेहरा झाकलेला होता.
