Loksabha Election 2024 : आजपासून लोकसभा निवडणुकीसाठी पहिल्या टप्प्यातील मतदानाला सुरुवात झाली आहे. देशातील 102 जागांवर आज मतदान होत आहे. महाराष्ट्रात देखील 5 जागांवर आज मतदान सुरु आहे. पूर्व विदर्भातील मतदारांचे भवितव्य आज मतपेटीत बंद होणार आहे. त्याचा फैसला 4 जून रोजी होणार आहे. राज्यात गडचिरोली-चिमूर, रामटेक, नागपूर, चंद्रपूर , भंडारा गोंदिया या मतदारसंघात मतदान होत आहे.
आज अनेक नेत्यांनी, सेलिब्रिटींनी आपला मतदानाचा हक्क बजावत त्यांनी जनतेला मतदान करण्याचं आवाहन केलं आहे. तर उपमुख्यमंत्री देवेंद्र फडणवीस यांनी आपल्या कुटूंबासह मतदान केलं. यावेळी त्यांनी जनतेला मतदान करण्याचे आवाहन केले आहे.
देवेंद्र फडणवीस यांनी त्यांनी आई, पत्नीसह मतदानाचा हक्क बजावला. मतदान केल्यानंतर देवेंद्र फडणवीस म्हणाले की, लोकतंत्राचा महोत्सव सुरू झाला आहे. मी आणि माझ्या कुटुंबाने मतदान केले आहे. तसेच माझी विनंती आहे की सगळ्यांनी मतदान करावे. लोकतंत्राला मजबूत करा आणि लोकतंत्राच्या या महोत्सवात सहभागी व्हा, असे फडणवीस म्हणाले.
