Pankaj Tripathi : बॉलिवूडचे प्रसिद्ध अभिनेते पंकज त्रिपाठी (Pankaj Tripathi) यांच्यावर दु:खाचा डोंगर कोसळला आहे. कारण त्यांच्या जवळच्या व्यक्तीचे निधन झाले आहे. पंकज त्रिपाठी यांच्या बहिणीच्या पतीचे अपघातात निधन झाले आहे. तसेच पंकज यांच्या बहिणीची प्रकृती गंभीर असल्याचं देखील समोर आलं आहे.
मिळालेल्या माहितीनुसार, पंकज त्रिपाठी यांची बहिण सबिता आणि तिचा पती मुन्ना तिवारी हे दोघे स्विफ्ट कारमधून धनबादहून बंगालला जात होते. बंगालला जात असताना त्यांच्या गाडीचा अपघात झाला. त्यांची कार सुमारे तीन फूट उंच डिव्हायडरला धडकली होती. या अपघातानंतर सबिता आणि मुन्ना तिवारी यांना रूग्णालयात दाखल करण्यात आलं. पण उपचारादरम्यान मुन्ना तिवारी यांचं निधन झालं असून सबिता यांची प्रकृती गंभीर असून त्यांच्यावर उपचार सुरू आहेत.
या घटनेची माहिती लोक जनशक्ती पक्षाचे राष्ट्रीय अध्यक्ष चिराग पासवान यांनी सोशल मीडियावर एक पोस्ट शेअर करत दिली आहे. या पोस्टमध्ये त्यांनी म्हटलं आहे की, माझे मित्र आणि अभिनेते पंकज त्रिपाठी यांच्या मेहुण्याचा भीषण रस्ता अपघातात मृत्यू झाल्याची बातमी ऐकून मला मोठा धक्का बसला आहे. या दु:खाच्या प्रसंगी मुन्ना तिवारी यांच्या आत्म्याला शांती देवो आणि शोकाकुल परिवाराला धीर देवो ही ईश्वर चरणी प्रार्थना.
सध्या चिराग पासवान यांची ही पोस्ट सोशल मीडियावर मोठ्या प्रमाणात व्हायरल होत आहे. तसेच पंकज त्रिपाठी यांच्या बहिणीचा आणि तिच्या पतीच्या अपघाताचा एक फोटो सोशल मीडियावर व्हायरल होत आहे, ज्यामध्ये त्यांच्या कारचा चक्काचुर झालेला दिसत आहे.
