RR vs MI : काल (22 एप्रिल) राजस्थान रॉयल्स (RR) आणि मुंबई इंडियन्स (MI) यांच्यात चुरशीचा सामना पाहायला मिळाला. आयपीएल 2024 (IPL 2024) च्या 38 व्या सामन्यात राजस्थान रॉयल्सने एकतर्फी सामन्यात मुंबई इंडियन्सचा 9 गडी राखून पराभव केला. मुंबईने दिलेले 180 धावांचे लक्ष्य राजस्थानने केवळ एक गडी गमावून पूर्ण केले.
राजस्थान रॉयल्स संघाच्या वतीने यशस्वी जैस्वालने शानदार फलंदाजी करत शतक झळकावले. यशस्वीने 104 धावा करून नाबाद राहिला. त्याचवेळी कर्णधार संजू सॅमसनने 38 धावांची दमदार खेळी केली. यशस्वी आणि संजू यांनी दुसऱ्या विकेटसाठी अखंड शतकी भागीदारी केली.
तर दुसरीकडे प्रथम फलंदाजी करताना मुंबई इंडियन्सने 20 षटकांत 9 गडी गमावून 179 धावा केल्या. राजस्थान रॉयल्सकडून संदीप शर्माने पाच बळी घेतले. शेवटच्या षटकात संदीप शर्माने मुंबई इंडियन्सच्या तीन फलंदाजांना पॅव्हेलियनचा रस्ता दाखवला. मुंबई इंडियन्ससाठी टिळक वर्माने 45 चेंडूत 65 धावांची खेळी केली. त्याच्याशिवाय नेहल वढेराने 49 धावा केल्या.
