सध्या देशात लोकसभा निवडणुकीचा प्रचार सुरु आहे. दरम्यान महाराष्ट्रासह देशाचे लक्ष लागलेला लोकसभा मतदार संघ आहे तो म्हणजे बारामती लोकसभा मतदारसंघ. या बारामती लोकसभा मतदार संघात प्रथमच पवार विरुद्ध पवार अशी लढत होणार आहे. नणंद विरुद्ध भावजय अशी लढत येथे होणार आहे. या वेळी शरद पवारांची कन्या सुप्रिया सुळे आणि अजित पवारांच्या पत्नी सुनेत्रा पवार यांच्या लढत होणार आहे. याच निमित्ताने अजित यावर खडकवासला मतदारसंघाच्या दौऱ्यावर होते. यावेळी त्यांनी सुनेत्रा पवारांना विजयी करण्याचे आवाहन केले. तसेच सुनेत्रा पवारांना विजयी केल्यामुळे त्यांनी सांगितलेली कामे मला करावी लागणार आहेत, अन्यथा माझे काही खरे नाही असे मिश्किल वक्तव्य त्यांनी यावेळी केले.
अजित पवारांनी लोकसभा निवडणुकीच्या पार्श्वभूमीवर खडकवासला मतदारसंघाला भेट दिली. या गावातील ८० टक्के जमीन ही एनडीएसाठी घेण्यात आली आहे. यावर तोडगा काढायचा आहे. मात्र तो कधी निघेल जेव्हा, येथील खासदार संरक्षण मंत्र्यांना भेटतील. त्यामुळे तुम्ही आता घड्याळाला मतदान करावे. म्हणजे आपोआपच तुमचा प्रश्न आपला खासदार सोडवणार आहे. सुनेत्रा पवार खासदार झाल्यास तुमचा फायदाच आहे. उद्या बायकोने म्हटले हे काम करून द्या तर, मला ते करून द्यावेच लागणार आहे. नाहीतर माझे काही खरे नाही, असा मिश्किल वक्तव्य अजित पवारांनी केले.
