PM Narendra Modi : उद्या (29 एप्रिल) पंतप्रधान नरेंद्र मोदी हे पुणे दौऱ्यावर आहेत. ते महायुतीच्या उमेदवारांच्या प्रचारार्थ जाहीर सभा घेणार आहेत. पुणे, बारामती, शिरूर आणि मावळ लोकसभा मतदारसंघातील महायुतीच्या उमेदवारांच्या प्रचारार्थ पंतप्रधान मोदींची उद्या साजेपाच वाजता वानवडीतील रेसकोर्सच्या मैदानावर ‘महाविजय संपल्प सभा’ होणार आहे.
पंतप्रधान मोदींच्या उद्याच्या या सभेसाठी चारही मतदारसंघातून सुमारे दोन लाख नागरिक उपस्थित राहतील, असा दावा भाजपने केला आहे. तसेच या अनुषंगाने महायुतीतील सर्व घटक पक्षांनी जोरात तयारी सुरू केली आहे, अशी माहिती भाजप प्रदेश उपाध्यक्ष राजेश पांडे यांनी पत्रकार परिषदेत दिली.
राजेश पांडे यांनी सांगितले की, ही सभा रेसकोर्सच्या 128 एकर मैदानावर होणार असून त्याची तयारी युद्धपातळीवर सुरू आहे. सभेसाठी येणाऱ्या नागरिकांच्या सोईसाठी 22 एलईडी स्क्रीन लावल्या जाणार आहेत. तसेच शिवसेना, राष्ट्रवादी काँग्रेस, मनसे रिपाइ पक्षांतर्फे सभेच्या नियोजनाच्या बैठका सुरू आहेत.
