Sushma Andhare : नुकतीच एक मोठी दुर्घटना घडली आहे. ठाकरे गटाच्या नेत्या सुषमा अंधारे यांना घ्यायला आलेल्या हेलिकॉप्टरचा अपघात झाला आहे. महाडमध्ये सुषमा अंधारेंना घेण्यासाठी हेलिकॉप्टर आले होते. तेथून त्या बारामती येथील सभेसाठी जाणार होत्या. मात्र, अचानक त्यांना घ्यायला आलेल्या हेलिकॉप्टर क्रॅश झाले.
सुषमा अंधारेंना या हेलिपॅडवर पोहोचल्यानंतर त्यांना हेलिकॉप्टरचा अपघात झाल्याची माहिती मिळाली. सुदैवाने या अपघातात कोणतीही जीवितहानी झालेली नाही. या हेलिकॉप्टरमधील पायलट सुखरूप असल्याची माहिती मिळाली आहे. तर सुषमा अंधारे देखील सुखरूप आहेत.
सध्या सुषमा अंधारे यांचा महाराष्ट्र दौरा सुरू आहे. त्यासाठी त्यांना घेण्यासाठी हेलिकॉप्टर महाड येथे आले होते. मात्र, आता या हेलिकॉप्टरचा अपघात झाला असून या अपघाताचे कारण अद्याप अस्पष्ट आहे.
या अपघातावर सुषमा अंधारेंनी प्रतिक्रिया दिली. “मी सकाळी एका प्रचारासाठी जाणार होते. दिवसभरात माझ्या दोन-तीन सभा होत्या. तसेच रात्रीची महाडची सभा करून मी येथे थांबले होते. तर सकाळी हेलिपॅडवर मी आले तेव्हा हेलिकॉप्टर घिरट्या मारत होतं आणि अचानक ते कोसळलं. या हेलिकॉप्टरमधून मी आणि माझा भाऊ प्रवास करणार होतो. पण, सुदैवानं आम्हाला काहीही झालं नाही”, असं सुषमा अंधारे म्हणाल्या.
