Amit Shah In Kolhapur : सध्या लोकसभा निवडणुकीच्या पार्श्वभूमीवर सर्व पक्षांकडून जोरदार प्रचार केला जात आहे. तर या प्रचार सभांसाठी बडे नेते राज्यांचा दौरा करताना दिसत आहेत. यामध्ये आता केंद्रीय गृहमंत्री अमित शाह हे सध्या महाराष्ट्र दौऱ्यावर आहेत.
आज (3 मे) अमित शाह हे कोल्हापूरमध्ये आहेत. तर कोल्हापूर दौऱ्यादरम्यान अमित शाह यांनी करवीर निवासिनी श्री अंबाबाई मंदिराला भेट दिली आणि दर्शन घेतले. यावेळी त्यांच्यासोबत स्थानिक भाजपचे पदाधिकारी उपस्थित होते. तर अमित शाह यांचे अंबाबाई मंदिरातील फोटो सोशल मीडियावर व्हायरल होत आहेत.
श्री अंबाबाई मंदिराला भेट दिल्यानंतर अमित शाह यांनी महायुतीच्या नेत्यांशी चर्चा केली.यावेळी दोन्ही मतदारसंघातील उमेदवार धैर्यशील माने आणि संजय मंडलिक उपस्थित होते. यानंतर धनंजय महाडिक यांनी सांगितले की, अमित शाह यांनी दोन्ही जागांचा आढावा घेतला आहे. तसेच अमित शाह यांनी दीड तास धैर्यशील माने आणि संजय मंडलिक यांच्याकडून मतदारसंघातील सर्व माहिती घेतली.
दरम्यान, आज अमित शाह यांची सांगली आणि रत्नागिरीमध्ये सभा होणार आहे. या सभांनंतर ते कर्नाटककडे रवाना होणार आहेत.
