Loksabha Election 2024 : सध्या संपूर्ण देशात लोकसभा निवडणुकीची रणधुमाळी सुरू आहे. या पार्श्वभूमीवर भारताच्या निवडणूक आयोगाने जगातील सर्वात मोठ्या निवडणुकांचे साक्षीदार होण्यासाठी 23 देशांतील निवडणूक व्यवस्थापन संस्थांकडून (EMBs) 75 आंतरराष्ट्रीय अभ्यागतांना आमंत्रित केले आहे.
याबाबत निवडणूक आयोगाने म्हटले आहे की, सहभागाच्या प्रमाणात आणि परिमाणानुसार हा सराव पहिला आहे. भूतान, मंगोलिया, ऑस्ट्रेलिया, मादागास्कर, फिजी, किर्गिझ प्रजासत्ताक, रशिया, मोल्दोव्हा, ट्युनिशिया, सेशेल्स, कंबोडिया, नेपाळ, फिलीपिन्स, श्रीलंका, झिम्बाब्वे, बांगलादेश, कझाकिस्तान, जॉर्जिया, चिली, उझबेकिस्तान, मालदीव या 23 देशांमधून आमंत्रित प्रतिनिधी पापुआ न्यू गिनी गिनी आणि नामिबियातील विविध निवडणूक व्यवस्थापन संस्था आणि संघटनांचे प्रतिनिधित्व करतात. या 23 देशांसह इंटरनॅशनल फाउंडेशन फॉर इलेक्टोरल सिस्टीम (IFES) चे सदस्य आणि भूतान आणि इस्रायलमधील मीडिया टीम देखील सहभागी होणार आहेत.
4 मे पासून सुरू होणाऱ्या या कार्यक्रमाचा उद्देश परदेशी EMB ला भारताच्या निवडणूक व्यवस्थेतील बारकावे तसेच जगातील सर्वात मोठ्या लोकशाहीद्वारे वापरल्या जाणाऱ्या सर्वोत्तम पद्धतींचा परिचय करून देणे आहे, असे निवडणूक आयोगाने सांगितले.
तसेच 23 देशांचे हे प्रतिनिधी मतदानाची आणि संबंधित तयारीची पाहणी करण्यासाठी महाराष्ट्र, गोवा, गुजरात, कर्नाटक, मध्य प्रदेश आणि उत्तर प्रदेश या सहा राज्यांमधील विविध मतदारसंघांमध्ये छोट्या गटात जाणार आहेत. तर 9 मे रोजी या कार्यक्रमाची सांगता होणार आहे. दरम्यान, 19 एप्रिलपासून सुरू झालेल्या आणि सात टप्प्यांत होणाऱ्या लोकसभा निवडणुका 1 जून रोजी संपणार असून, 4 जून रोजी मतमोजणी होणार आहे.
